महिला भलिबलमा फेरि भारत तगारो

हाङझाव : १९औं एसियाली खेलकुदअन्तर्गत महिला भलिबलमा नेपाल पराजित भएको छ । बुधबार भएको खेलमा नेपालले दक्षिण एसियाली प्रतिद्वन्द्वी भारतसँग ३–१ ले पराजय बेहोरेको हो । डेक्विन स्पोर्ट्स सेन्टर जिम्नाजियममा भारतलाई कडा टक्कर दिए पनि नेपाल जितबाट चुकेको थियो । तेस्रो सेटमा लगातार ६ अंकको अग्रतालाई जोगाउन नसक्दा नेपालले त्यो सेट भारतलाई सुम्पिएपछि लय गुमाएको थियो ।
पहिलो सेट २३–२५ ले गुमाएको नेपालले दोस्रो सेट २८–२६ ले आफ्नो पक्षमा पारेको थियो । तेस्रो सेटमा फराकिलो अग्रतालाई जोगाउन नसक्दा नेपालले २३–२५ ले भारतलाई नतिजा सुम्पिएको थियो । चौथो सेटमा सुरुदेखि नै हावी भएको भारतले २५–१७ ले जित खेल आफ्नो पक्षमा पारेको थियो ।
नेपालले अब ११औं स्थानका लागि प्रतिस्पर्धा गर्नेछ । समूह चरणमा भियतनाम र कोरियासँग पराजित भएको नेपालले नवौं स्थानको खेलमा छनोट हुनका लागि भारतसँग प्रतिस्पर्धा गरेको थियो । अब नेपालले हङकङ, मंगोलिया र अफगानिस्तान सम्मिलित प्लेअफ समूहको विजेतासँग खेल्नेछ ।
चार वर्षअघि स्वदेशमा भएको दक्षिण एसियाली खेलकुद (साग) को फानइनलमा भारतलाई कडा टक्कर दिनका बाबजुद नेपाली टोली ३–२ ले पराजित भएको थियो । गत वर्ष काठमाडौंमै भएको काभा महिला च्यालेन्ज कपमा पनि नेपाल भारतसँग पराजित भएको थियो । महिला भलिबलमा नेपालले अहिलेसम्म भारतलाई हराउन सकेको छैन ।
खेलपछि नेपाली टोलीकी कप्तान अरुणा शाहीले खेलाडीको प्रदर्शनमा एकरुपता नहुँदा पराजय बेहोर्नु परेको बताइन् । ‘हामीले आफ्नो प्रदर्शनमा एकरुपता दिन सकेनौं । खेलको अधिकांश समय भारतलाई दबाबमा राखे पनि जित भने निकाल्न सकेनौं’, अरुणा भन्छिन्, ‘यस पटक भारतलाई पराजित गर्ने सुवर्ण अवसर थियो । त्यो पूरा हुन सकेन ।’ नेपाली टोलीका प्रशिक्षक जान डी ब्रान्टले कमजोर तयारी, भौतिक पूर्वाधारको अभावमा पनि नेपाली खेलाडीले उत्कृष्ट प्रदर्शन गरेको बताए ।