नेपालमाला
९ श्रावण २०८०, मंगलवार 
काठमाडौँ : प्रमुख प्रतिपक्षी दल एमाले अध्यक्ष केपी शर्मा ओलीले त्रिभुवन अन्तर्राष्ट्रिय विमानस्थलबाट एक क्विन्टल सुन बाहिरिएको सन्दर्भमा उपप्रधान तथा गृहमन्त्री नारायणकाजी श्रेष्ठले दिएको अभिव्यक्तिप्रति गम्भीर आपत्ति प्रकट गरेका छन् । उनले गृहमन्त्रीको ‘बद्तमिज र गैरजिम्मेवारी’ ले हद नाघेको उल्लेख गरेका छन् ।
कम्बोडिया भ्रमणबाट फर्केका अध्यक्ष ओलीले सोमबार राति त्रिभुवन अन्तर्राष्ट्रिय विमानस्थलमा सञ्चारकर्मीहरुसँग गृहमन्त्रीले दिएको अभिव्यक्ति र उनको कार्यशैलीमाथि टिप्पणी गरेका हुन् । ‘नारायणकाजी श्रेष्ठ गृहमन्त्री हुनुहुन्छ । उहाँले एयरपोर्टमा सेक्युरिटी बन्दोबस्त गर्नु भएको छ कि छैन ? एयरपोर्टमा सक्युरिटी गर्ने काम उहाँको हो कि होइन ? यहाँको आउने जानेहरुको निरीक्षण गर्ने काम उहाँको हो कि होइन ?’ अध्यक्ष ओलीले भने,’अनि क्विन्टलका क्विन्टलका सुन बाहिर जान्छ गृहमन्त्री ‘कोट’को गाला र ‘टार’को गालामा काँक्राको बियाँ टाँस्दै हुनुहुन्छ । यो अत्यन्तै अनैतिक क्रियाकलाप हो । गृहमन्त्रीको क्रियाकलाप गैरजिम्मेवार छ । आफू गृहमन्त्री भएर यस्ता खालका गैरजिम्मेवार कुरा गरेर हिँड्ने ?’
गृहमन्त्री श्रेष्ठले सुन पक्राउ परेपछि विमानस्थल भन्सार र अध्यागमनको निरीक्षण गर्ने क्रममा बालुवाटार र बालकोटप्रति संकेत गर्दै कुनै पनि ‘टार, कोट र पार्टी’ ले पनि यसको छानबिनमा रोक्न नसक्ने बताएका थिए । ‘कतै तीन ब- बालकोट, बालुवाटार र बूढानीलकण्ठ) मिलेर यो घटना सामसुम पारिने त होइन’ भन्ने सञ्चारकर्मीको प्रश्नमा गृहमन्त्री श्रेष्ठले भनेका थिए,’भ्रष्टाचार र अपराधका कुरा अनुसन्धान गर्दाखेरी मलाई कुनै कोट, टार र पार्टी मतलब छैन ।’गृहमन्त्री श्रेष्ठले दिएको यही अभिव्यक्तिप्रति संकेत गर्दै अध्यक्ष ओलीले यत्रो घटना हुँदा गृहमन्त्रीको भूमिका के थियो त्यसमाथि नै आशंका गरेका छन् ।
‘गृहमन्त्रीले बताउन पर्यो सुन प्रकरणमा उहाँको संलग्नता छ कि छैन ? सानोतिनो संलग्नताबाट त यो काम भएको छैन होला ! उहाँको चाहिँ संलग्नता छ कि छैन ? छैन भने कोचाहिँ संलग्न छ ?’ ओलीले गृहमन्त्री श्रेष्ठमाथि प्रश्न गर्दै भने,’ यत्तिकै ‘कोट’का गालामा कांक्राको बियाँ टाँस्ने होइन । म उहाँलाई सचेत गराउन चाहन्छु । गृहमन्त्रीको हैसियतले उहाँले बोल्दाखेरी तरिका पुर्याएर बोल्नुहोस् । बद्तमिज हुनु एउटा कुरा हो । तर यो बद्तमिज मात्र होइन गैरजिम्वारीको हद भयो । गृहमन्त्री भएर जथाभावी बोल्ने ? जथाभावी बोल्न गृहमन्त्रीलाई छुट छ ?’
अध्यक्ष ओलीले अरु कसैले गृहमन्त्रीको जवाफदेहीताको कुरा उठायो भने मुद्दा हाल्न जाने ? भन्दै प्रश्न गरेका छन् । एमालेको भ्रातृ संगठनका अध्यक्ष गणेश बस्नेतले फेसबुकमा गृहमन्त्रीको नाम जोडेर स्टाटस लेखेपछि गृहमन्त्रीको सचिवालयले उनीबिरुद्ध साइबर ब्यूरोमा उजुरी दिएको थियो । त्यसैप्रति ओलीले संकेत गर्दै भने, ‘गृहमन्त्रीको जवाफदेहीताको कुरा उठायो भने मुद्दा हाल्न जाने ? गृहमन्त्रीमाथि मुद्दा हाल्ने कि नहाल्ने ? गृहमन्त्रीले कोट र टारका सम्बन्धमा चर्चा गरेको कुराको अर्थ के हो ?’
उनले एक व्यापारीसँग कुनै कार्यक्रममा खिचेको फोटो अहिलेको प्रसंगमा ल्याएर जोडेर एक पत्रिकाले आफ्नो छापेको भन्दै त्यसप्रति पनि आपत्ति जनाए । उक्त पत्रिका माओवादीनिकट भएको आरोपसमेत लगाउँदै ओलीले भने, ‘उता आकाशतिर चिल देखाएर यता के छोप्प लुकाउन खोजिँदैछ ? अब यो सुनकाण्डको नतिजा अन्तिमसम्म नपुर्याउँदासम्म हामी पनि छोड्दैनौं । गृहमन्त्रीलाई थाहा होस् ।’
पहिले पनि सुन तस्करी हुने गरेको र त्यसलाई आफूहर”ले खनेर निकालेको ओलीले दाबी गरे । ‘फेरि पनि हामी खनेर ननिकालेसम्म छोड्दैनौं । यसमा कारबाही के हुन्छ हामी हेरिरहेका छौं । कसमाथि कारबाही हुन्छ ? को जिम्मेवार छ ? बोक्न त प्लेन, गाडी, भरियाले बोक्यो होला । बोकाउने को हो ? प्लेनलाई, गाडीलाई, भरियालाई कसले बोकायो प्रश्न यो हो । त्यसकारण यो ढाकछोप गर्न सकिँदैन,’ अध्यक्ष ओलीले भने ।
