नेपालमाला
२२ मंसिर २०७९, बिहीबार 
धनकुटा : झुटा आरोपमा पक्राउ परेका नेपाली कांग्रेस धनकुटाका नगर सभापति नरेश श्रेष्ठ र सदस्य शिवपुजन साह आज रिहा भएका छन् । ज्यान मार्ने झुटा आरोपमा पक्राउ परेका नेपाली कांग्रेस धनकुटा नगर सभापति नरेश श्रेष्ठ र नगर सदस्य साह जिल्ला अदालतबाट धरौटीमा रिहा भएका हुन् ।
नेकपा एमालेका केही नेताहरुले षड्यन्त्र गरी फसाउने उद्देश्यले नेपाली कांग्रेस धनकुटाका नगर सभापति श्रेष्ठ र सदस्य साहलाई एमालेका कार्यकर्ताहरुलाई कुटपिट गरेको भनी झुटा आरोप लगाएर ज्यान मार्ने मुद्दा दर्ता गरेका थिए । उनीहरु दुवै जनालाई जिल्ला अदालत धनकुटाले जनही ४० हजार रुपैयाँ धरौटी लिई तारेखमा रिहा गरेको हो । सभापति श्रेष्ठ र सदस्य साहको पक्षमा डिएलए धनकुटाका वकिलहरुले बहस गरेको डिएलए धनकुटाका अध्यक्ष लाखमान राईले जानकारी दिए ।
रिहा भएका नेपाली कांग्रेस धनकुटा नगर सभापति श्रेष्ठ र सदस्य साहलाई नेपाली कांग्रेस धनकुटाका जिल्ला सभापति दिनेश राई, जिल्ला सचिव तथा धनकुटा नगर संयोजक विजय सन्तोषी राईलगायतका नेताहरुले खादा लगाई स्वागत गरेका थिए । यस्तै धनकुटा नगरपालिका–५ का वडाध्यक्ष धनकुमार राई, वडा नं. ६ का वडाध्यक्ष मिलनकुमार खड्गीलगायत जनप्रतिनिधि र नेपाली कांग्रेसका नेता तथा कार्यकर्ताहरुको सहभागिता रहेको थियो ।
नेकपा एमालेका धनकुटा नगरपालिका वडा नं. ६ का कार्यकर्ता राजन कार्की मादक पदार्थ सेवन गरी आफै लडेर घाइते भएकोमा उनलाई कुटपिट गरी घाइते बनाएको भनी कपोलकल्पित तरिकाले झुटा आरोप लगाई षडयन्त्रपूर्वक ढंगले नगर सभापति श्रेष्ठ र सदस्य साहलाई फसाउन नेकपा एमालेका केही नेता तथा कार्यकर्ताहरु लागिपरेका थिए । नेकपा एमाले धनकुटाका नेता तथा कार्यकर्ताहरुले धनकुटामा जितको दम्भ र उन्मातका कारण नेपाली कांग्रेस धनकुटाका नेता तथा कार्यकर्तामाथि बारम्बार झुटा मुद्दा लगाई फसाउन षड्यन्त्र गरिरहे नेपाली कांग्रेस धनकुटाले अब नेकपा एमाले धनकुटाको कडा प्रतिवाद गर्ने चेतावानी दिँदै यस किसिमको हर्कद तत्काल बन्द गर्नसमेत नेपाली कांग्रेस धनकुटाले नेकपा एमालेलाई चेतावनी दिएको छ ।
