अफगानिस्तानको कप्तानबाट हटे नावी

एडिलेड : अस्ट्रेलियामा जारी टीट्वेन्टी विश्वकप क्रिकेटको समूह चरणबाटै बाहिरिएपछि अफगानिस्तानका कप्तान मोहम्मद नावीले कप्तानबाट राजीनामा दिएका छन् । सुपर १२ अन्तर्गत समूह ‘एक’को अन्तिम खेलमा अफगानिस्तान अस्ट्रेलियासँग चार रनले पराजित भएको थियो ।
कप्तानी छाडे पनि उनले अफगानिस्तानका लागि खेल्न नछाड्ने बताएका छन् । हारपछि विज्ञप्ति निकालेर नावीले भनेका छन्, ‘तत्काल लागु हुने गरी मैले कप्तान छाडेको छु । टिम र व्यवस्थापनलाई मेरो आवश्यकता परेमा मैले राष्ट्रका लागि निरन्तर खेल्ने छु ।’
सुपर १२ मा तीन खेल हार बेहारेको अफगानिस्तानले दुई खेलमा भने वर्षाका कारण अंक बाँडेको थियो ।

शुक्रबार एडिलेड भएको रोमाञ्चक खेलमा घरेलु टोली अस्ट्रेलियासँग अफगानिस्तान चार रनको झिनो अन्तरले पराजित भएको थियो । एक सय ६९ रनको लक्ष्य पछ्याएको अफगानिस्तानले निर्धारित २० ओभरमा सात विकेट गुमाएर एक सय ६४ रन मात्रै बनाउन सक्यो । अफगानिस्तानका रासिद खानले २३ बलमा ४८ रनको विस्फोटक पालि खेले पनि टोलीलाई जित दिलाउन सकेनन् । १४औं र १४औं ओभरमा लगातार चार विकेट गुमाएपछि अफगानिस्तान ऐतिहासिक जितबाट विमुख भएको थियो ।