नेपालमाला
८ बैशाख २०७९, शुक्रबार 
काठमाडौं : गण्डकी प्रदेशका सौगात कुमाल र एपीएफका पुरन राई गणेशमान सिंह स्मृति राष्ट्रिय बक्सिङ प्रतियोगिताको सेमिफाइनलमा प्रवेश गरेका छन् ।
वीर गणेशमान सिंह स्पोर्ट्स कमिटीद्वारा आयोजित प्रतियोगिताको पुरुष ५७ केजी तौल समूहमा बिहीबार भएको क्वार्टरफाइनलमा सौगातले मधेस प्रदेशका अमन अली र पुरनले लुम्बिनी प्रदेशका निशम घर्तीमगरलाई पराजित गर्दै अन्तिम चारमा स्थान बनाए ।
पुरुष ५२ केजीमा मधेसका मदनकृष्ण डंगोलले सुदूरपश्चिम प्रदेशका सन्दीप नाथ तथा एपीएफका प्रदीप महर्जनले बागमती प्रदेशका रोहित महर्जनलाई हराउँदै सेमिफाइनलमा स्थान बनाए । पुरुष ६३ केजीमा त्रिभुवन आर्मी क्लबका पुरन सुनुवारले बागमतीका मौसम रानामगर र लुम्बिनीका अनिल पुनमगरले सुदूरपश्चिमका महेन्द्र चन्दलाई पाखा लगाउँदै सेमिफाइनलमा स्थान सुरक्षित गरे ।
बसन्तपुर डबलीमा जारी प्रतियोगिताको पुरुष ६९ केजीमा आर्मीका दानबहादुर दर्लामीले लुम्बिनीका विकास राना मगरलाई पन्छ्याउदै सेमिफाइनल यात्रा तय गरे । सोही तौलसमूहमा बागमतीका शिरीश खनालले प्रदेश १ का अभिनय राईबाट वाकओभर पाउँदै अन्तिम चारमा पुगे । पुरुष ७५ केजीमा कर्णाली प्रदेशका दिलराज भण्डारीले सुदूरपश्चिमका भूपेन्द्र बिसी तथा प्रदेश १ का सनम गुरुङले गण्डकीका निसान गुरुङको चुनौती समाप्त पार्दै सेमिफाइनलमा स्थान बनाए । पुरुष ८१ केजीमा बागमतीका रोशन स्याङ्तान र सुदूरपश्चिमका श्यामबहादुर महता अन्तिम चारमा पुग्न सफल भए । रोशनले मधेसका किरण लामा तथा श्यामले गण्डकीका मनीष बिसीमाथि जित निकाले । पुरुष ९१ केजीमा आर्मीका गणेश प्रधानले सुदूरपश्चिमका दिनेश भट्ट तथा प्रदेश १ का प्रसिश रुचालले बागमतीका उमंग महर्जनलाई निराश पार्दै सेमिफाइनलमा स्थान बनाए ।
महिला ५१ केजीमा १३औं दक्षिण एसियाली खेलकुद (साग) की स्वर्ण विजेता आर्मीकी मीनु गुरुङ र लुम्बिनीकी माया खत्रीले सेमिफाइनलमा स्थान बनाए । मीनुले बागमतीकी अस्मिता दुवाल र मायाले सुदूरपश्चिमकी सोनिया सेठ्ठीलाई हराए ।
महिला ५७ केजीमा नेपाल पुलिसकी निशा तामाङले मधेस प्रदेशकी सुमिना खड्का तथा प्रदेश १ की सुस्मिता राईले गण्डकीकी सीमा गुरुङलाई पराजित गर्दै सेमिफाइनलमा पुगे । महिला ६० केजीमा एपीएफकी संगिता सुनारले प्रदेश १ की सम्झना देउलाबाट वाकओभर पाइन् । अर्को क्वार्टरफाइनलमा प्रदेश १ की नारिका राईले लुम्बिनीकी सुरक्षाकुमारी कुमाललाई पाखा लगाउँदै सेमिफाइनलमा पुगिन् । महिला ६९ केजीमा लुम्बिनीकी जुनमाया थारुले कर्णालीकी अस्मिता चन्दलाई पन्छ्याउदै सेमिफाइनलमा स्थान पक्का गरिन् ।
