नेपालमाला
१७ फाल्गुन २०७८, मंगलवार 
काठमाडौं : प्रमुख प्रतिपक्ष दल नेकपा (एमाले)का अध्यक्ष केपी शर्मा ओलीले सभामुख अग्निप्रसाद सापकोटा र माधवकुमार नेपाल नेतृत्वको नेकपा (एकीकृत समाजवादी)का सांसदहरूको पद जाने भएकाले रातारात एमसीसी सम्झौता अनुमोदन गर्ने वातावरण बनेको बताएका छन् ।
मंगलबार काठमाडौंमा पार्टीले गरेको पत्रकार सम्मेलनमा बोल्दै उनले एमसीसी राष्ट्रघाती थियो भने किन पारित गरेको भन्दै प्रश्न समेत गरे ।
उनले एमसीसी सम्झौता राष्ट्रघाती हो भनेर प्रचार गर्ने नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ र एकीकृत समाजवादीका अध्यक्ष माधव नेपालले कार्यकर्तालाई बाटो भत्काउन र ढुंगामुढा गर्न लगाएर सत्ता जोगाउन लागिपरेको जिकिर गरे ।
“एमसीसीमा राष्ट्रघात होइन भने प्रचण्ड र माधव नेपालहरूले कार्यकर्ता उकासेर बाटो भत्काउने र ढुंगामुढा गर्न लगाउनुभयो अनि आफूचाहिँ सत्ता जोगाउन लाग्ने,” उनले भने,“ सभामुख र माधव नेपालका सांसदहरूको पद जाने भएपछि एमसीसी पास भयो ।”
यही कुरा आफूहरूले फागुन १५ गतेअघि भन्न चाहेको भए पनि संसद् बैठक नचलेका कारण भन्न नसकेको उनले बताए । “संसद्मा छलफल र छलफल गराउने वातावरण बनाएर छलफलमा सहभागी हुन चाह्यौँ । तर, हामीमाथि ज्यादतीपूर्ण ढंगले क्रियाकलाप गरियो । संसद्को ठूलो पार्टीले विरोध गर्दा पनि संसद् चल्यो,” उनले भने ।
