ए डिभिजन लिग : पुलिसको पहिलो जित

काठमाडौं : विभागीय टोली नेपाल पुलिस क्लबले सहिद स्मारक ‘ए’ डिभिजन लिग फुटबलमा पहिलो जित निकालेको छ । त्रिपुरेश्वरस्थित दशरथ रंगशालामा आइतबार भएको खेलमा जावलाखेल युथ क्लबलाई १–० गोलले पराजित गर्दै पुलिसले पहिलो जित निकालेको हो ।
पुलिसलाई जित दिलाउन सुमन लामाले निर्णायक गोल गरेका थिए । परिवर्तित खेलाडीका रुपमा मैदान प्रवेश गरेका लामाले ७०औं मिनेटमा पुलिसलाई अग्रता दिलाएका थिए । रवि पासवानको पासमा लामाले उत्कृष्ट गोल गरेका थिए । त्यही गोल खेलको निर्णायक बनेको थियो ।
प्रतिस्पर्धात्मक खेलको पहिलो हाफ गोलरहित बराबरीमा सकिएको थियो । तेस्रो मिनेटमै जावलाखेलका ओन्गुना जुनियरले गोल गर्ने राम्रो अवसर खेर फालेका थिए । डिबक्सभित्र गोलरक्षकलाई बिट गर्दै प्रहार गरेको उनको बलले जाली चुम्न सकेन । १०औं मिनेटमा अमिर श्रेष्ठले डिबक्सभित्रबाट प्रहार गरेको बलले पनि पोस्ट्को दिशा लिन सकेन । ४०औं मिनेटमा पुलिसका तेज तामाङको प्रहारलाई जावलाखेलका गोलरक्षकले विफल पारेका थिए ।
खेलको ४६औं मिनेटमा जावलाखेलका रुपबहादुर लामाले पनि गोलको राम्रो अवसर खेर फालेका थिए । ६७औं मिनेटमा जावलाखेलका सन्तबहादुर गुरुङको प्रहार पनि पोस्ट्मा लागेर फर्किएको थियो । खेलको ८९औं मिनेटमा पुलिसका भरत शाहको प्रहार जावलाखेलका गोलरक्षकले मुश्किलले विफल पारेका थिए । जितसँगै पुलिसले दुई खेलबाट चार अंक जोडेको छ । पहिलो खेलमा पुलिसले त्रिभुवन आर्मी क्लबसँग १–१ गोलको बराबरी खेल्दै अंक बाँडेको थियो । जावलाखेलको भने यो लगातार दोस्रो हार हो । पहिलो खेलमा जावलाखेल मनाङ मस्र्याङ्दीसँग १–० गोलले पराजित भएको थियो ।
कतार एयरवेजको मुख्य प्रायोजनमा सञ्चालन भइरहेको सहिद स्मारक ‘ए’ डिभिजन लिगअन्तर्गत सोमबार दुई खेल हुनेछ । पहिलो खेलमा न्युरोड टिम एनआरटी र ब्रिगेड ब्वाइज क्लबले प्रतिस्पर्धा गर्ने छन् । दोस्रो खेलमा विभागीय टोली त्रिभुवन आर्मी र मच्छिन्द्र क्लबबीच खेल हुनेछ । फागुन १४ गतेसम्म सञ्चालन हुने लिगको विजेताले ७५ लाख रुपैयाँ नगद पुरस्कार पाउने छ । यसैगरी उपविजेताले ५० लाख र तेस्रो हुने टोलीले २५ लाख पुरस्कार पाउने छन् ।