नेपालको लगातार दोस्रोे जित

काठमाडौं : आईसीसी महिला टीट्वेन्टी विश्वकप एसिया छनोटको खेलमा नेपालले दोस्रो जित निकालेको छ । संयुक्त अरब इमिरेट्स (यूएई) को दुबईमा बिहीबार भएको खेलमा नेपालले कुवेतलाई नौ विकेटले पराजित गर्दै लगातार दोस्रो जित निकालेको हो ।
दुबईको आईसीसी एकेडेमी मैदानमा कुवेतले दिएको २८ रनको सामान्य लक्ष्य नेपालले ३.३ ओभरमा एक विकेट गुमाएर पूरा ग¥यो । नेपालको जितमा इन्दु बर्माले अविजित १३ र कप्तान रुबिना क्षत्रीले १२ रन बनाए । प्रारम्भिक ब्याट्सम्यान सीता रानामगरले भने खाता खोल्न सकिनन् । कुवेतकी मारिया जस्भीले एक विकेट हात पारिन् ।
यसअघि टस जितेर पहिले ब्याटिङ गरेको कुवेतले १५.४ ओभरमा अलआउट हुँदै २७ रन मात्र जोड्न सक्यो । कुवेतका लागि प्रियदा मुरलीले सर्वाधिक १० रन बनाइन् । यसैगरी मारियम ओमारले सात, मारिया जस्भीले पाँच र आकृति बोसले दुई रन जोडे । कुवेतका अरु खेलाडीले रन बनाउन सकेनन् । कुवेतका सात जना खेलाडी खाता नखोली पेभेलियन फर्किएका थिए ।
कुवेतलाई सस्तैमा समेट्न संगीता राईले तीन विकेट लिइन् । यस्तै कप्तान रुबिना क्षत्री र करुणा भण्डारीले दुई÷दुई तथा स्वतीकुमारी चौधरीले एक विकेट लिए । नेपालकी कप्तान रुबिना क्षत्री प्लेयर अफ दी म्याच चुनिइन् ।
नेपालले यसअघि पहिलो खेलमा हङकङसँग ६ विकेटले पराजय भोगे पनि दोस्रो खेलमा भुटानलाई आठ विकेटले पराजित गरेको थियो । कुवेतले भने लगातार तेस्रो खेलमा पराजय बेहोरेको छ । पहिलो खेलमा भुटानसँग ४० रन र मलेसियासँग ८१ रनको हार बेहोरेको थियो ।
जितसँगै नेपाल तालिकाको दोस्रो स्थानमा उक्लिएको छ । नेपालले दुई खेलबाट चार अंक जोडेको छ । लगातार तीन खेलमा जित निकाल्दै ६ अंक जोडेको यूएई शीर्ष स्थानमा छ । चार अंक नै जोडेको हङकङ तेस्रो, दुई अंक जोडेको मलेसिया चौथो र दुई अंक नै जोडेको भुटान पाँचौं स्थानमा छन् । लगातार तेस्रो खेलमा पराजय बेहोरेको कुवेत ग्लोबल छनोटको होडबाट बाहिरिएको छ । शीर्ष स्थान हात पार्ने टोलीले ग्लोबल छनोटमा प्रतिस्पर्धा गर्न पाउने छ । नेपालले शुक्रबार मलेसिया र आइतबार यूएईसँग प्रतिस्पर्धा गर्नेछ ।