अलमुताइरीले गरे सम्झौता नवीकरण

काठमाडौं : नेपाली राष्ट्रिय फुटबल टोलीका मुख्य प्रशिक्षक अब्दुल्लाह अलमुतारी आगामी तीन वर्षसम्म नेपालमै बस्ने भएका छन् । उनले अखिल नेपाल फुटबल संघ (एन्फा) सँग थप दुई वर्षका लागि सम्झौता नवीकरण गर्दै तीन वर्षसम्म नेपाल बस्ने घोषणा गरेका हुन् ।
कुवेतका फुटबल म्यानेजर अलमुताइरीले एन्फा अध्यक्ष कर्माछिरिङ शेर्पासँगको विशेष छलफलपछि नेपाल फर्किन राजी भएको बताएका छन् । ‘कर्माछिरिङ शेर्पासँगको भेटपछि मैले नयाँ सम्झौता गर्ने निर्णय गरेको छु । एन्फा र कतार फुटबल संघलाई धन्यबाद दिन चाहन्छु’, उनले बुधबार फेसबुकमा स्टाटस लेख्दै भनेका छन्, ‘हामी चाँडै आगामी दुई वर्षको लक्ष्य र योजना सार्वजनिक गर्दै छौं । नेपालको फुटबलको भविष्य अब राम्रो हुनेछ । तर, त्यसका लागि समय चाहिन्छ । नेपाली समर्थकको माया मलाई मात्र नभएर खेलाडीहरुलाई पनि चाहिएको छ । हामीलाई सहयोग गर्नुहोस् र हामीमा विश्वास गर्नुहोस् ।’
एन्फा अध्यक्ष शेर्पाले पनि अलमुताइरी थप दुई वर्षका लागि नेपाल आउन लागेको पुष्टि गरेका छन् । शेर्पाले अलमुताइरी र कुवेत फुटबल संघका पदाधिकारीसँग कुवेतमै विशेष छलफलपछि सम्झौता नवीकरण गर्न राजी भएको जानकारी दिए । नेपाली कांग्रेसको तरुण विभागले बुधबार साफ च्याम्पियनसिपमा उपविजेता बनेको नेपाली राष्ट्रिय फुटबल टोलीको सम्मानमा आयोजना गरेको कार्यक्रममा बोल्दै अध्यक्ष शेर्पाले अलमुताइरीसँग थप दुई वर्षका लागि सम्झौता भएको बताएका हुन् । ‘नेपाली टोलीका मुख्य प्रशिक्षक अलमुताइरीले थप दुई वर्ष सम्झौता गरेका छन् । उनको नेपाल बसाइले नेपाली फुटबलको विकासमा महत्वपूर्ण भूमिका खेल्ने विश्वास गरेको छु’, अध्यक्ष शेर्पाले भने ।
कुवेतका फुटबल म्यानेजर अलमुताइरी २०७७ चैतमा नेपालको मुख्य प्रशिक्षकमा नियुक्त भएका थिए । प्रो–लाइसेन्स प्राप्त अलमुताइरी सन् २०२२ को फिफा विश्वकप छनोट र सन् २०२३ को एसिया कपअन्तर्गत दोस्रो चरणको छनोटका लागि नेपाली टोली सम्हाल्न नेपाल आएका थिए ।
गत साउन १० गते सामाजिक सञ्जाल फेसबुकमा स्टाटस लेख्दै आफूले राष्ट्रिय टोलीको मुख्य प्रशिक्षकबाट राजीनामा दिन लागेको घोषणा गरेका थिए । उनले एन्फाका वरिष्ठ उपाध्यक्ष पंकजविक्रम नेम्वाङका कारण राजीनामा दिन बाध्य भएको बताएका थिए । त्यसपछि विवादले उग्र रुप लिएपछि राष्ट्रिय खेलकुद परिषद्ले बोर्ड सदस्य पुरेन्द्रविक्रम लाखेको संयोजकत्वमा सात सदस्यीय छानबिन समिति गठन गरेको थियो । समितिले विवादको मुल जड सामाजिक सञ्जालको अत्याधि प्रयोग, आपसी सम्बन्ध विस्तार हुन नसक्नु, आचारसंहिता पूर्ण रुपमा प्रयोग नगर्नु, खेल क्षेत्रमा धुम्रपान र मद्यपानलगायतका क्रियाकलापलाई निरुत्साहन गर्न नसक्नुलगायतका विषय औंल्याउँदै अलमुताइरीलाई सचेत गराउनुपर्ने सुझाव दिएको थियो ।
प्रतिवेदन सार्वजनिक भएपछि अलमुताइरीले असन्तुष्टि व्यक्त गरेका थिए । उनले सामाजिक सञ्जाल फेसबुकमा स्टाटस लेख्दै नेपाली टोली छाड्ने संकेत गरेका थिए । यसैगरी साफ च्याम्पियनसिपका क्रममा पनि उनले कहिल्यै नेपाल नफर्किने घोषणा गरेका थिए । माल्दिभ्समा आयोजना भएको साफ च्याम्पियनसिपपछि उनी नेपाल नआइकन सोझै कुवेत गएका थिए ।
दक्षिण एसियाली फुटबल महासंघ (साफ) च्याम्पियनसिप फुटबलको २८ वर्षको इतिहासमा नेपाल पहिलो पटक उपाधि नजिक पुगेको थियो । फाइनलमा चिरप्रतिद्वन्द्वी भारतसँग ३–० गोलले पराजित भए पनि फाइनल पुगेर नेपालले ऐतिहासिक उपलब्धि हासिल गरेको थियो । यसअघिका संस्करणमा सेमिफाइनलबाट अगाडि बढ्न नसकेको नेपालको ऐतिहासिक सफलतामा अलमुताइरीले सारथीको भूमिका निर्वाह गरेका थिए । । बिजयादशमीका दिन उनले नेपाली टोलीका सदस्यसँगै ढाका टोपीमा सजिएर निधारमा लगाएको रातो टीका र कानमा जमरा सिउरिएको उनको तस्बिर निकै भाइरल भएको थियो । मुस्लिम नागरिक अलमुताइरीले नेपालको चाडवाड र संस्कृतिप्रति देखाएको सहिष्णुपूर्ण सद्भावले पनि उनले नेपालीमाझ थप चर्चा कमाएका थिए ।