तेक्वान्दो संघको अधिवेशन शनिबार

भैरहवा : नेपाल तेक्वान्दो संघको चौथो अघिवेशन लुम्बिनी प्रदेशको भैरहवामा शनिबार हुने भएको छ । संघले बिहीबार भैरहवामा पत्रकार सम्मेलन गर्दै चौथो अधिवेशनको सम्पूर्ण तयारी पूरा भएको जनाएको हो ।
अधिवेशनमा ५६ जिल्ला संघका अध्यक्ष, सात प्रदेशका अध्यक्षलगायत विभिन्न क्षेत्रका प्रतिनिधिहरुको सहभागिता रहने छ । खेलकुद विकास ऐन अनुसार सात प्रदेश गठन भइसकेको र आगामी मंसिरभित्र प्रदेश संघको अधिवेशन सम्पन्न गरी नेतृत्व चयन गर्ने संघले जनाएको छ । यसैगरी देशका विभिन्न पालिकाहरुमा तेक्वान्दो विकास समिति गठनको काम भइरहेको नेपाल तेक्वान्दो संघका अध्यक्ष प्रकाशशम्शेर राणाले जानकारी दिए । उनले काठमाडौं उपत्यकाका सम्पूर्ण पालिकाहरुमा समिति गठन गरिसकेको जानकारी दिए ।
अधिवेशनले एक अध्यक्ष, तीन उपाध्यक्ष, एक महासचिव, एक कोषाध्यक्ष र ११ सदस्य निर्वाचित गर्नेछ ।
२०३९ सालमा नेपाल मार्सल आर्ट्स संघका नाममा स्थापना भएको तेक्वान्दो २०४६ पछि छुट्टै संघका नाममा स्थापित भएको हो । लामो समय तदर्थ रुपमा सञ्चालन हुँदै आएको संघको २०६६ मा वीरगञ्जमा पहिलो पटक लोकतान्त्रिक विधिबाट पदाधिकारी चयन गरिएको थियो । यसैगरी संघको २०७० मा दोस्रो र २०७४ मा तेस्रो अधिवेशन सम्पन्न भएको थियो । यसअघिका सबै अधिवेशनले सर्वसम्मत रुपमा नेतृत्व चयन गर्दै आएको छ ।