नेपालमाला
१ असार २०७८, बुधबार 
सेन्ट पिटर्सवर्ग : रसियाले युरोकप फुटबलमा पहिलो जित निकालेको छ । बुधबार राति भएको खेलमा फिनल्यान्डलाई १–० गोलले पराजित गर्दै रसियाले युरोकपमा पहिलो जित निकालेको हो ।
पहिलो खेलमा विश्व नम्बर एक बेल्जियमसँग ३–० गोलले पराजित भएको रसियाले पहिलो पटक युरोकप खेलिरहेको फिनल्यान्डलाई पराजित गर्न निकै संघर्ष गर्नुपरेको थियो । रसियाको जितमा एरेक्सी मिरानचुकीले निर्णायक गोल गरेका थिए । उनले पहिलो हाफको इन्जुरी समयमा आर्टेम डेजुबाको पासमा गोल गरेका थिए । फिनल्यान्डले खेलको चौथो मिनेटमै गोल गरे पनि त्यसले मान्यता पाउन सकेन । जोएल पोहजानपालोले गरेको गोललाई रेफ्रीले भीएआरको सहयोगमा अमान्य घोषित गरेका थिए ।
जितसँगै रसियाले दुई खेलबाट तीन अंक जोडेको छ । समूह ‘बी’मा दोस्रो स्थानमा रहेको रसियाले अन्तिम १६ मा पुग्ने सम्भावना पनि कायमै राखेको छ । यस समूहमा तीन अंक जोडेको बेल्जियम पहिलो, दुई खेलमा तीन अंक नै जोडेको तेस्रो र अंक जोड्न नसकेको डेनमार्क अन्तिम स्थानमा छन् ।
