नेपालमाला
२ असार २०७८, बुधबार 
काठमाडौं : नेपाली पारा तेक्वान्दो खेलाडी पलेशा गोवद्र्धनले टोकियो पारा ओलम्पिकको वाइल्ड कार्ड प्राप्त गरेकी छन् ।
गत जेठमा जोर्डनमा आयोजना भएको छनोट प्रतियोगितामा सहभागी हुन नसकेपछि नेपाल तेक्वान्दो संघले वाइल्ड कार्डका लागि विश्व तेक्वान्दो महासंघसँग अनुरोध गरेको थियो । संघले पलेशासँगै रञ्जना धामीको नाम पठाए पनि पलेशाले मात्रै वाइल्ड कार्ड पाउन सकेकी हुन् ।
ओलम्पिक खेलकुद सम्पन्न भएको एक महिनापछि सुरु हुने पारा ओलम्पिकमा पलेशाले पारा तेक्वान्दोको के–४४ विधाको ५८ केजीमुनिको तौल समूहमा प्रतिस्पर्धा गर्ने छिन् । विश्व तेक्वान्दो महासंघको पछिल्लो वरीयतामा पलेशा १३औं स्थानमा छिन् । रञ्जना धामी पनि १३औं स्थानमै रहे पनि एउटा देशबाट एक जना खेलाडीलाई मात्र वाइल्ड कार्ड दिने पौवधान अनुरुप पलेशाले पाएको नेपाल तेक्वान्दो संघले जनाएको छ ।
पारा ओलम्पिक अगष्ट २४ देखि सेप्टेम्बर ५ सम्म सञ्चालन हुँदैछ । पारा तेक्वान्दोको प्रतिस्पर्धा भने सेप्टेम्बर २–४ तारिखसम्म हुनेछ ।
पलेशाले २०७२ सालदेखि तेक्वान्दो खेल्न थालेकी हुन् । उनले भियतनाममा सम्पन्न चौथो एसियन पारा च्याम्पियनसिपमा कांस्य पदक जितेकी थिइन् । यस्तै दक्षिण कोरिया, बेलायत, जोर्डन, टर्कीलगायतका देशमा पुगेर पनि उत्कृष्ट प्रदर्शन गरेकी थिइन् ।
