अस्ट्रेलियासँग गर या मरको स्थिति

काठमाडौं : अर्को वर्ष कतारमा आयोजना हुने फिफा विश्वकप छनोट र सन् २०२३ को एसिया कपअन्तर्गत दोस्रो चरणको छनोटमा नेपालले शुक्रबार बलियो प्रतिद्वन्द्वी अस्ट्रेलियाको सामना गर्दै छ । कुवेतको राजधानी कुवेत सिटीस्थित जबर अल–अहमद अन्तर्राष्ट्रिय रंगशालामा नेपाल र अस्ट्रेलियाबीचको खेल राति ९ः४५ बजे सुरु हुनेछ । समूह ‘बी’मा रहेको नेपालले शुक्रबार अन्तिम खेल खेल्दैछन् ।
कोरोना महामारीका कारण यसअघि पटकपटक स्थगित हुँदै आएको खेल न्युट्रल भेन्यु कुवेतमा हुन लागेको हो । नेपालले घरेलु मैदानमा खेल्नुपर्ने विश्वकप छनोटका खेलहरू कोरोना महामारी बढेपछि एसियाली फुटबल महासंघ (एएफसी) ले सेन्ट्रल भेन्युका रूपमा कुवेतलाई रोजेको हो ।
नेपालका लागि अस्ट्रेलिया निकै बलियो प्रतिद्वन्द्वी हो । विश्व फुटबल महासंघ (फिफा) को पछिल्लो वरीयतामा पनि अस्ट्रेलिया ४१औं र नेपाल एक सय ७१औं स्थानमा छन् । अस्ट्रेलियन टोलीका थुप्रै खेलाडीले इङ्लिस प्रिमियर लिग र बुन्डेस लिगाको अनुभव बटुलिसकेका छन् । त्यसैले शुक्रबार बलियो प्रतिद्वन्द्वीविरुद्ध अस्ट्रेलियाविरुद्ध मैदान उत्रिँदा नेपालको लक्ष्य अंक खोस्नु हुनेछ । तर, पाँच पटक विश्वकप खेलिसकेको अस्ट्रेलियालाई रोक्नु नेपालका लागि फलामको च्युरा चपाउनु सरह हुनेछ ।
नेपाली टोलीका मुख्य प्रशिक्षक अब्दुल्लाह अल्मुताइरीले आफ्नो ध्यान नतिजामा भन्दा पनि राम्रो खेल्नेमा रहेको बताएका छन् । बिहीबार आयोजित प्रिम्याच कन्फ्रेन्समा अल्मुताइरीले आफ्नो ध्यान नतिजामा भन्दा राम्रो खेल्नेमा रहेको बताएका हुन् । ‘हामीले पछिल्लो समय खेल्ने शैलीमा केही परिवर्तन गरेका छौं । अहिले त्यसको नतिजा आउन थालेको छ । तर, छोटो समयमा केही पनि सजिलो हुन्न’, उनले भने, ‘फुटबलमा नतिजा पनि उत्तिकै महत्वपूर्ण हुन्छ । हामीले भविष्यमा अझ राम्रो नतिजा दिन सक्ने छौं ।’
अस्ट्रेलिया भने नेपाललाई हराएर विश्वकप छनोटको तेस्रो चरणमा पुग्न चाहन्छ । नेपालले अस्ट्रेलियासँग यसअघि एक खेल मात्रै खेलेको छ । विश्वकप छनोटअन्तर्गत नै नेपालले २०१९ को अक्टोबर १० मा अस्ट्रेलियासँग पहिलो लेगको खेल खेलेको थियो । अस्ट्रेलियाको घरेलु मैदानमा नेपालले फराकिलो हार बेहोरेको थियो । क्यानबेरास्थित जीआईओ स्टेडियममा नेपाल घरेलु टिमसँग ५–० ले पराजित हुँदा जेमी म्याक्लारेनले ह्याट्रिक गरेका थिए । यस्तै ह्यारी सटरले एक गोल नेपालका दिनेश राजवंशीले आत्मघाती गोल गरेका थिए ।
कुवेतमा नेपालले खेलेका दुई खेलमध्ये एकमा जित र एकमा हार बेहोरेको छ । पहिलो खेलमा चाइनिज ताइपेईलाई २–० गोलले हराएको नेपाल जोर्डनसँग ३–० गोलले पराजित भएको थियो । मुख्य प्रशिक्षक अब्दुल्लाह अलमुताइरीले टोलीमा व्यापक परिवर्तन गर्दै युवा खेलाडीलाई मौका दिएका थिए । उनले गत चैतमा थ्री नेसन्स कप जित्दाको टोलीका १३ खेलाडी परिवर्तन गरेका थिए । नेपाली युवा टोलीले इराकसँगको मैत्रीपूर्ण र चाइनिज ताइपेईविरुद्धको खेलमा प्रभाव जमाए पनि जोर्डनसँगको खेलमा भने कमजोर प्रदर्शन गरेका थिए । नेपालले कुनै पनि समय जोर्डनलाई दबाबमा राख्न सकेन । त्यसकै फाइदा उठाउँदै जोर्डनले लगातार नेपालको पोस्ट्मा आक्रमण बुनेको थियो ।
विश्वकप छनोटको खेलमा नेपालले सात खेल खेलिसकेको छ । जसमध्ये चाइनिज ताइपेईलाई दुवै लेगको खेलमा पराजित गर्दै ६ अंक जोडेको छ । नेपालले कुवेतसँगको पहिलो खेलमा ७–० र दोस्रो खेलमा १–० गोलले हार बेहोरेको थियो । यस्तै जोर्डनसँगको दुवै खेलमा समान ३–० गोलले हार बेहोरेको थियो । अस्ट्रेलियासँगको पहिलो खेलमा नेपाल ५–० गोलले पराजित भएको थियो । अस्ट्रेलिया अहिलेसम्म अपराजित छ । अस्ट्रेलियाले खेलेका ६ खेलमै जित निकाल्दै १८ अंक बनाएको छ । अस्ट्रेलिया शीर्ष स्थानमा रहँदा १३ अंक जोडेको जोर्डन दोस्रो र १० अंक रहेको कुवेत तेस्रो स्थानमा छ । नेपाल ६ अंकसहित चौथो र अंक जोड्न नसकेको चाइनिज ताइपेई पुछारमा छ ।
विश्वकप छनोटको अघिल्लो चरणमा पुग्ने नेपालको सम्भावना सकिसकेको छ । जोर्डनसँग ३–० गोलले पराजित भएपछि नेपालको विश्वकप छनोटको यात्रा औपचारिक रुपमै समाप्त भएको हो । तर, सन् २०२३ मा हुने एसियन कपमा सीधै छनोट हुने सम्भावना सकिए पनि प्लेअफबाट तेस्रो चरणमा पुग्ने सम्भावना भने बाँकी छ । अहिले भइरहेको छनोटबाट उत्कृष्ट १२ टोली एसिया कपमा सीधै छनोट हुनेछन् भने त्यसपछि १६ टिम एसिया कप छनोटको तेस्रो चरणमा प्रवेश गर्नेछन् । एसिया कपमा २४ टिमले प्रतिस्पर्धा गर्ने भएकाले बाँकी १२ स्थानका लागि तेस्रो चरणको छनोट हुनेछ । त्यसमा थप आठ टिम प्लेअफबाट आउनेछन् । नेपालले पनि प्लेअफबाटै तेस्रो चरणमा पुग्नका लागि प्रतिस्पर्धा गर्नुपर्ने हुन्छ । तर, त्यसको टुंगो सबै समूहको खेलपछि मात्रै लाग्नेछ ।
समूह एचमा रहेको उत्तर कोरियाले कोरोनाका कारण नाम फिर्ता लिएपछि प्लेअफका लागि अब ११ टिमबीच प्रतिस्पर्धा हुनेछ । अहिलेसम्म प्लेअफका लागि ६ टोली छनोट भइसकेका छन् । जसमा समूह बाट गुवाम, समूह बीबाट चाइनिज ताइपेई, समूह सीबाट कम्बोडिया, समूह एफबाट मंगोलिया, समूह जीबाट इन्डोनेसिया र समूह एचबाट श्रीलंका छन् ।