नेपालमाला
११ जेष्ठ २०७८, मंगलवार 
काठमाडौं : नेपाल तरुण दलले सरकारका असंवैधानिक कदमविरुद्ध आन्दोलन गर्न सबै जिल्ला कार्यसमितिलाई परिपत्र गरेको छ । तरुण दलका केन्द्रीय अध्यक्ष जित जंग बस्नेतले आज एक विज्ञप्ति जारी गर्दै सरकारको असंवैधानिक, अलोकतान्त्रिक, निरंकुश, स्वेच्छाचारी र प्रतिगामी कदमविरुद्ध आन्दोलनमा उत्रिन तरुण दलका जिल्ला कार्यसमितिलाई निर्देशन दिएका हुन् ।
‘जेठ ७ गते मध्यरातमा राष्ट्रपति विद्यादेवी भण्डारी र प्रधानमन्त्री केपी शर्मा ओलीद्वारा षड्यन्त्रपूर्वक तरिकाले गरिएको जनताको सर्वोच्च निकाय प्रतिनिधिसभाको विघटन असंवैधानिक, अलोकतान्त्रिक, निरङ्कुश, स्वेच्छाचारी र प्रतिगामी भएको नेपाल तरुण दल केन्द्रिय समितिको ठहर छ । उक्त कदम ईतिहासमै जनता र जनप्रतिनिधि जनप्रतिनिधिहरुको साझा थलो संसद माथि गरिएको सबैभन्दा ठूलो धोका र गद्दारीपुर्ण कार्य हो,’ विज्ञप्तिमा भनिएको छ, ‘उक्त कदमको नेपाल दल घोर निन्दा र भर्त्सना गर्दछ । कोरोना महामारीले देश र जनता आक्रान्त भएको संकटपुर्ण यस अवस्थामा जनतालाई सहज उपचारको व्यवस्था मिलाउने कार्यलाइ बेवास्ता गर्दै मध्यावधि निर्वाचनको घोषणा गर्नु देश र जनताप्रतिको गैरजिम्मेवारीको पराकाष्ठा हो भने जनताको स्वास्थ्य माथिको गम्भीर खेलवाड अक्षम्य अपराध हो ।’
तरुण दल अध्यक्ष बस्नेतले स्वास्थ्य मापदण्डको पूर्ण पालना गरेर आन्दोलनका कार्यक्रम गर्न परिपत्र गरेका हुन् ।
तरुण दलले योङ कम्युनिष्ट नेपाल (वाइसिएल), समाजवादी युवा संघ–नेपाल, युवा संघ नेपाल, अखिल नेपाल युवक संघ, विवेकशिल साझा युवा संगठनसंग समन्वय गरी संयुक्त संघर्षका कार्यक्रम गर्न निर्देशन दिएको हो ।
