नेपालमाला
५ जेष्ठ २०७८, बुधबार 
काठमाडौं : बुधबार बिहानै लगतार दुई पटक भूकम्प भएपछि लमजुङवासी त्रासमा रहेका छन् । बुधबार बिहान ५ बजेर ४२ मिनेटमा लमजुङको भुलभुले केन्द्र भएर ५.८ म्याग्नेच्युटको भूकम्प गएको थियो । पहिलो भूकम्पको धक्का काठमाडौंलगायत देशका विभिन्न स्थानमा महसूस गरिएको थियो।
लमजुङको भुलभुलेमा नै बुधबार फेरि अर्को भूकम्प गएको थियो । भूकम्प मापन केन्द्रका अनुसार बिहान ८ बजेर २६ मिनेटमा ५.३ म्याग्नेच्युटको भूकम्प गएको हो । राष्ट्रिय भूकम्प मापन केन्द्रका प्राविधिक सहायक राजेश शर्माका अनुसार लमजुङको भुलभुलेमा केन्द्र भएर दुई पटक भूकम्प गएको हो ।
लमजुङमा बुधबार बिहान गएको भूकम्पले केही घर भत्किनुका साथै केही स्थानीय घाइते भएका छन् । भूकम्पको केन्द्रविन्दु मर्स्याङ्दी गाउँपालिकाका घरहरूमा बढीजसो क्षति पुगेको छ । गाउँपालिका अध्यक्ष अर्जुन गुरुङले भूकम्पपछि मानिसहरूबीच भागाभाग भएको बताएका छन् । उनका अनुसार केही घरमा क्षति पुगेको र केही स्थानीय घाइते भएको जनाइएको छ ।
लगातार एकै स्थानमा केन्द्रबिन्दु बनाएर भूकम्प गएपछि स्थानीय त्रासमा रहेका अध्यक्ष गुरुङले बताए ।
