नेपाल सुपर लिग : काठमाडौं फाइनलमा

काठमाडौं : काठमाडौं रेजर्स एफसी पहिलो संस्करणको फ्रेन्चाइज फुटबल प्रतियोगिता खुकुरी नेपाल सुपर लिग (एनएसएल) को फाइनलमा प्रवेश गरेको छ । त्रिपुरेश्वरस्थित दशरथ रंगशालामा बिहीबार भएको खेलमा ललितपुर सिटी एफसीलाई ३–० गोलले पराजित गर्दै काठमाडौंले फाइनलमा स्थान बनाएको हो ।
काठमाडौंलाई प्रभावशाली जित दिलाउन मेसौके ओलोमोउले दुई तथा स्टेफेन विनोङले एक गोल गरे । विराटनगरलाई ५–४ ले पराजित गर्दा मेसौकेले लिगकै पहिलो ह्याट्रिक गरेका थिए । उनी लिगमा सर्वाधिक गोल गर्ने खेलाडीको सूचीमा पनि पहिलो स्थानमा छन् । उनले अहिलेसम्म सात गोल गरिसकेका छन् ।
दुवै टोलीले सुरुवातदेखि नै आक्रामक खेल खेले पनि काठमाडौंले पाएको अवसरलाई सदुपयोग गरेका कारण ललितपुर दबाबमा परेको थियो । खेलको १५औं मिनेटमा काठमाडौंले अग्रता लिएको थियो । डीबक्स क्षेत्रभित्र मेसौकेलाई ललितपुरका कमल श्रेष्ठले फल गरेपछि रेफ्री प्रज्ज्वल क्षत्रीले काठमाडौंलाई पेनाल्टी दिएका थिए । पेनाल्टीमा मेसौकेले नै गोल गर्दै टोलीलाई अग्रता दिलाए । यसैगरी खेलको २२औं मिनेटमा काठमाडौंले अग्रता दोब्बर बनाएको थियो । डीबक्सभित्रबाट मेसौकेले गरेको प्रहारलाई ललितपुरका गोलरक्षक अर्पण कार्कीले बचाउन सकेनन् ।
त्यसअघि दुवै टोलीले गोलको सुनौलो अवसर गुमाएको थियो । ललितपुरका भिलिम कोसिनकोभिचले गोल पोस्ट् नजिकै सुनौलो अवसर गुमाएका थिए । नुर्लान जाहिदले गोलरक्षक विकेश कुथुलाई बिट गर्दै उपलब्ध गराएको उत्कृष्ट बलमा भिलिम गोल गर्नबाट चुकेका थिए । त्यसलगत्तै काठमाडौंका आशिष राईले पनि पोस्ट् नजिकैबाट राम्रो अवसर खेर फालेका थिए ।
खेलको २८औं मिनेटमा ललितपुरका गौरव बुढाथोकीले पनि अर्को अवसर गुमाए । कप्तान अञ्जन विष्टको पासमा गोलरक्षक विकेश कुथु अघि बढेको अवस्थामा गौरवले खाली पोस्टमा प्रहार गरेको बलले जाली चुम्न सकेन । खेलको ६०औं मिनेटमा स्टेफन बिनोङले गोल गर्दै काठमाडौंलाई ३–० को अग्रता दिलाए । उनले तेज तामाङले उपलब्ध गराएको बललाई अफसाइड बिट गर्दै गोलरक्षक अर्पण कार्कीसँगको वान भर्सेज वानमा उत्कृष्ट गोल गरेका थिए । ७१औं मिनेटमा ललितपुरका डोना थापाको फ्रिकिक प्रहारले पनि पोस्ट्को दिशा लिन सकेन । ७९औं मिनेटमा ललितपुरका अञ्जन विष्टले डीबक्स बाहिरबाट गरेको प्रहार पनि आकासिएको थियो । निर्धारित समय सकिन एक मिनेट बाँकी छँदा नुर्लानको हेडर बलले पनि सही दिशा लिन सकेन ।
बिहीबारको खेलको प्लेयर अफ दी म्याच काठमाडौंका मेसौके ओलोमोउ चुनिए । उनले २५ हजार नगद पुरस्कार पाए । यसैगरी इमिर्जङ प्लेयर अफ दी म्याच काठमाडौंकै आशिष गुरुङ घोषित भए । उनले १० हजार नगद पुरस्कार प्राप्त गरे ।
काठमाडौंले उपाधिका लागि शनिबार धनगढी एफसीसँग प्रतिस्पर्धा गर्नेछ । प्लेअफको पहिलो खेलमा काठमाडौं रेजर्सलाई २–१ गोलले पराजित गर्दै धनगढीले फाइनलमा स्थान बनाएको थियो । लिग चरणको खेलमा पनि काठमाडौं धनगढीसँग ३–० गोलले पराजित भएको थियो । ललितपुरले बुधबार भएको एलिमिनेटर खेलमा बुटवल लुम्बिनी एफसीलाई १–० गोलले पराजित गर्दै काठमाडौंसँगको भिडन्त पक्का गरेको थियो ।
काठमाडौं लिगमा चार खेल जित्ने एक मात्र टोली बनेको थियो । ६ खेलमध्ये काठमाडौंले चार खेलमा जित, एक बराबरी र एक हार गरी १३ अंक जोडेको थियो । लिगको दोस्रो स्थानमा रहँदै प्लेअफमा स्थान बनाएको धनगढीले ६ मध्ये तीन खेलमा जित निकालेको थियो । यस्तै दुई खेलमा हार बेर्होदा एक खेल बराबरी खेलेको थियो ।
प्रतियोगिताका विजेताले ३५ लाख रुपैयाँ पुरस्कार पाउनेछ । यस्तै उपविजेताले १५ लाख रुपैयाँ प्राप्त गर्नेछ । प्रतियोगिताको विधागततर्फका उत्कृष्टले जनही एक लाख रुपैयाँ पाउनेछन् ।