नेपालमाला
२० बैशाख २०७८, मंगलवार 
काठमाडौं : काठमाडौं रेजर्सले नेपाल सुपर लिग (एनएसएल) फुटबलमा दोस्रो जित निकालेको छ । त्रिपुरेश्वरस्थित दशरथ रंगशालामा मंगलबार भएको खेलमा बुटवल लुम्बिनी एफसीलाई १–० गोलले पराजित गर्दै काठमाडौंले दोस्रो जित निकालेको हो । काठमाडौंलाई जित दिलाउन स्टेफन बिनोङले निर्णायक गोल गरे ।
खेलको सुरुवातबाटै दुवै टोलीले आक्रामक खेल खेलेका थिए । चौथो मिनेटमा काठमाडौंका तेज तामाङको क्रसमा स्टेफन बिनोङको हेड बललाई बुटवलका गोलरक्षक विशाल श्रेष्ठले गोललाइनबाट बचाउ गरेका थिए । पाँचौं मिनेटमा स्टेफनले गोल गर्दै काठमाडौंलाई १–० को अग्रता दिलाए । सुदिल राईको लामो पासमा गोलरक्षक विशाल श्रेष्ठलाई बिट गर्दै स्टेफनले गोल गरेका थिए ।
निकै रोमाञ्चक खेलको छैटौं मिनेटमा बुटवलले पेनाल्टीको अवसर पायो । काठमाडौंका विश्वास श्रेष्ठले सुमन लामालाई लडाएपछि बुटवलले पेनाल्टी पाएको थियो । तर, पेनाल्टीमा बुटवलका विलियम ओपोकु गोल गर्न चुके । उनको प्रहारलाई काठमाडौंका गोलरक्षक विकेश कुथुले विफल पारेका थिए ।
१८औं मिनेटमा कर्नरबाट आएको बलमा छिरिङ गुरुङको प्रहार बुटवलका डिफेन्डर ओलोलाजा करिमले गोल लाइनबाट बचाएका थिए । पहिलो हाफको इन्जुरी समयमा काठमाडौंका आशिष राईको डिबक्स बाहिरको सशक्त प्रहार बारमा लागेर फर्किएको थियो । ६४औं मिनेटमा आशिष लामाको प्रहार पोस्टको नजिकैबाट बाहिरिँदा बुटवल बराबरी गर्न असफल भएको थियो । खेलको अन्तिमतिर बुटवलले लगातार पोस्ट् आक्रमण बुने पनि गोल गर्न नसक्दा निरास बन्न पुग्यो ।
काठमाडौंका कप्तान विकेश कुथु प्लेयर अफ दी म्याच चुनिए । उनले २५ हजार पुरस्कार प्राप्त गरे । इमर्जिङ प्लेयर अफ दी म्याच काठमाडौंका सुदिल राई घोषित भए । उनले १० हजार रुपैयाँ पाए ।
जितसँगै काठमाडौं लिगको तेस्रो स्थानमा उक्लिएको छ । काठमाडौंले चार खेलबाट सात अंक जोडेको छ । विराटनगर र धनगढीको पनि समान सात अंक भए पनि गोलभिन्नताका आधारमा काठमाडौं तेस्रो स्थानमा रहेको हो । विराटनगर लिगको शीर्ष स्थानमा छ । धनगढी दोस्रो स्थानमा छ ।
बुटवलको भने यो पहिलो हार हो । यस हारसँगै बुटवल लुम्बिनी शीर्ष स्थानमा उक्लिन असफल भएको छ । बुटवल लुम्बिनीले चार खेलबाट पाँच अंक जोडेको छ ।
