विराजको त्यो गोल !

काठमाडौं : नेपाली राष्ट्रिय फुटबल टोलीका पूर्व कप्तान विराज महर्जनले अन्तर्राष्ट्रिय खेलजीवन टुङ्ग्याएका छन् । सोमबार त्रिपुरेश्वरस्थित दशरथ रंगशालामा भएको बंगलादेशविरुद्धको थ्री नेसन्स कप फुटबलको उपाधि नेपाललाई दिलाएसँगै विराजले अन्तर्राष्ट्रिय खेलजीवन टुङ्ग्याएका हुन् ।
नेपाली फुटबलकै सर्वाधिक सफल कप्तानको छवि बनाएका विराजले दुई वर्षपछि राष्ट्रिय टोलीमा पुनरागमन गर्दै खेलाडी जीवनबाट बिट मारेका हुन् । सन् २०१९ जुनमा भएको मलेसियाविरुद्धको मैत्रीपूर्ण खेलपछि विराजले राष्ट्रिय टोलीमा स्थान बनाउन सकेका थिएनन् ।
विराजले सन् २००८ मा पोखरा रंगशलामा भएको पाकिस्तानविरुद्धको अन्तर्राष्ट्रिय मैत्रीपूर्ण खेलबाट नेपाली राष्ट्रिय टोलीमा डेब्यु गरेका थिए । वि.सं २०५७ सालमा एन्फा एकेडेमीमा भर्ना भएका विराजले राष्ट्रिय टोलीमा डेब्यु गर्नुअघि विभिन्न उमेर समूहमा नेपालको प्रतिनिधित्व गरेका थिए । उनले १८ वर्षको उमेरमै राष्ट्रिय टोलीमा डेब्यु गरेका थिए । सन् २०१५ डिसेम्बर २७ मा साफ च्याम्पियनसिपअन्तर्गत समूह चरणमा भारतविरुद्धको खेलमा उनले पहिलो पटक राष्ट्रिय टोलीको कप्तानी सम्हालेका थिए ।
विराजको कप्तानीमा नेपालले १८ खेल खेलेको छ । सन् २००९ मार्च २८ मा एएफसी च्यालेन्ज कपअन्र्तगत काजकिस्तानविरुद्ध गरेको गोल नै विराजले १३ वर्षे अन्तर्राष्ट्रिय खेल जीवनका गरेको एक मात्र गोल हो ।
विराजको कप्तानीमा नेपालले सन् २०१६ मा बंगबन्धु गोल्डकप दक्षिण एसियाली खेलकुद (साग) र सोलिडारिटी कप गरी एकै वर्ष लगातार तीन उपाधि जितेको थियो । ३१ वर्षे विराजले राष्ट्रिय टोलीबाट ७२ खेल खेलेका छन् ।
घरेलु प्रतियोगितामा पनि विराजले आफूलाई सफल खेलाडी र कप्तानको रुपमा प्रमाणित गर्दै आएका छन् । विराजले थ्रीस्टार, मनाङ मस्र्याङ्दी र मच्छिन्द्र क्लबबाट सहिद स्मारक ए डिभिजन लिगको उपाधि जितिसकेका छन् ।
विराजले घरेलु भूमिमा नेपाललाई उपाधि दिलाएर सन्न्यास लिन पाउँदा खुसी लागेको बताए । ‘आजको दिन मेरा लागि महत्वपूर्ण रह्यो । घरेलु मैदानबाट विश्राम लिन पाउँदा गौरवान्ति छु’, उनले भने ।