नेपालमाला
७ चैत्र २०७७, शनिबार 
काठमाडौं : नेकपा (एमाले)का वरिष्ठ नेता माधवकुमार नेपालले पार्टी अध्यक्ष केपी ओलीसँग छुट्टिने पक्षमा आफू नरहेको बताएका छन् । युवा संघको भेलालाई शनिबार सम्बोधन गर्दै पूर्वप्रधानमन्त्रीसमेत रहेका नेता नेपालले यस्तो बताएका हुन् ।
नेता नेपालले अध्यक्ष ओलीसँग नछुट्टिने तर त्यसका लागि सबैले विधानका आधारमा चल्नुपर्नेमा जोड दिए । उनले ओलीसँगको मायाप्रिती ४८/४९ वर्षको भएको भन्दै एक रातमा नछुट्टिने बताएका हुन् ।
‘मैले भनेको छु, विधानका आधारमा अगाडि बढौँ । प्रत्येक व्यक्ति कमिटी र संगठनको मातहतमा हुन्छ । केपी कमरेडले त्यो स्वीकार गरे हामी सँगै जाने पक्षमा छौँ । हामी केपी ओलीसँग छुट्टिने पक्षमा छैनौँ’, नेता नेपालले भने, ‘त्यत्रो लामो समयको माया–प्रीति कहाँ एक रातमा छुट्टिन्छ ? केपी ओलीसँगको मेरो माया प्रिति ४८/४९ वर्षको भयो थाहा छ ?’
नेपालले नेकपाको एकता खारेज गराउने सर्वोच्च अदालतको फैसलाप्रति असन्तुष्टि जनाए । फागुन २३ गते सर्वोच्च अदालतले नेकपाको नामको मुद्दामाथि गरेको फैसलाले नेकपा खारेज भएको थियो । तर उक्त फैसलालाई नेता नेपालले जन्मिसकेको बच्चालाई गर्भमै लैजान भने जस्तै अव्यवहारिक निर्णय भएको टिप्पणी गरे ।
शनिबार नेपाल पक्षीय युवा संघ नेपालको कार्यकर्ता भेलालाई सम्बोधन गर्दै उनले यस्तो टिप्पणी गरेका हुन् । तर सर्वोच्चको फैसला गलत भए पनि पालना गर्नुपर्ने बाध्यता भएको नेपालको भनाइ थियो ।
‘अब हामीले असहमति भए पनि सर्वोच्चको फैसला लागू गर्दिनँ भन्न मिलेन। बाध्य भएर त्यसलाई लागू गर्नुपर्ने भयो । जन्मेको बच्चा मान्दैनौँ, फेरि गर्भमा लिएर जाऊ भनेजस्तै फैसला हो यो’नेता नेपालले भनेका छन् ।
अदालतले पार्टीको नाम जुधेकोमा फेरि अर्को नाम राख्न सुझाव दिनुपर्नेमा एकता नै रद्द गरी विचित्रको फैसला गरेको नेपालको भनाइ छ। गत फागुन २३ गते सर्वोच्च अदालतको फैसलासँगै पुरानै नेकपा एमाले र नेकपा माओवादी केन्द्र ब्यूँतिएका छन् ।
