नेपालमाला
२२ फाल्गुन २०७७, शनिबार 
काठमाडौं : नेपालको प्रजातान्त्रिक आन्दोलनका सर्वमान्य नेता गणेशमान सिंहको स्मृतिमा काठमाडौंको स्युचाटारमा सञ्चालन भएको वीर गणेशमान सिंह बागमती प्रदेश स्तरीय बक्सिङ प्रतियोगिता आज सकिँदै छ ।
फागुन १७ गतेबाट सुरु भएको प्रतियोगिताको शनिबार १४ वटै तौल समूहको फाइनल खेल हुने आयोजक नागार्जुन बक्सिङ खेलकुद समितिका अध्यक्ष सन्तोष बुढाथोकीले जानकारी दिए । प्रतियोगितामा महिलातर्फ ६ र पुरुषमा ८ तौल समूहमा प्रतिस्पर्धा भएको थियो । प्रतियोगिता नागार्जुन नगरपालिकाको विशेष सहयोगमा आयोजना गरिएको हो ।
प्रतियोगिताको हरेक तौलसमूहका विजेताले नगद १० हजार, दोस्रो हुनेले सात हजार र तेस्रो हुने खेलाडीले जनही चार हजार रुपैयाँ पुरस्कार प्राप्त गर्ने छन् । प्रतियोगिताका उत्कृष्ट महिला खेलाडीले स्कुटर र पुरुष खेलाडीले मोटरसाइकल पाउनेछन् ।
शुक्रबार भएको पुरुष ६४ केजी तौल समूहमा ललितपुरका सनिल शाहीले धादिङका पवन गुरुङ र महिला ४८ केजीमा नक्सालकी सुस्मिता तामाङले भक्तपुरकी अस्मिता दुवाललाई पराजित गर्दै फाइनलमा स्थान बनाएका हुन् । सनिल १३औं दक्षिण एसियाली खेलकुद (साग)का स्वर्ण विजेता हुन् । सुस्मिताले प्रदेश ५ मा आयोजना भएको आठौं राष्ट्रिय खेलकुद प्रतियोगितामा स्वर्ण जितेकी थिइन् । पुरुष ६४ केजीमा प्लाटिनमका अस्विनदेव श्रेष्ठले काभ्रेका भरत चन्दलाई पराजित गर्दै उपाधि नजिक पुगे । महिला ४८ केजीमा आरडीएसकी रमिसा श्रेष्ठले बोसिगाउँकी माया क्षत्रीलाई पराजित गर्दै सुस्मितासँगको भेट पक्का गरिन् ।
यसैगरी महिला ५१ केजीमा बोसिगाउँकी हरिना ऐर र नक्सालकी रोशनी राई उपाधि नजिक पुगे । हरिनाले नुवाकोटकी प्रतिभा शाही र रोशनीले प्लाटिनमकी केनिका राईलाई पराजित गरे । महिला ५४ केजीमा थानकोटकी सुशीला ब्लोनले आरडीएसकी सदीक्षा मगर र मेघदूतकी मन्दिरा पुतुवारले बक्समान्डुकी जस्मिन केसीलाई पराजित गर्दै फाइनलमा स्थान बनाए । महिला ५७ केजीमा नक्सालकी सिवानी श्रेष्ठले आरडीएसकी सुमिरा रुपाखेती र रामेछापकी डोल्मा तामाङले बक्समान्डुकी श्रद्धा प्रसाईलाई पराजित गर्दै उपाधि नजिक पुगे ।
महिलाकै ६० केजीमा रसुवाकी सजिता चौधरी र बक्समान्डुकी डिचेन शेर्पा फाइनलमा पुगे । सजिताले केन्द्रीय बक्सिङकी स्नेहा मानन्धर र डिचेनले नुवाकोटकी रीता विकलाई सेमिफाइनलमा पराजित गरे । महिला ६४ केजीमा नक्सालकी अम्विका गहतराजले नुवाकोटकी अस्मिता चन्द तथा बक्समान्डुकी हेमा राईले रसुवाकी सपना ऐडीलाई पराजित गरे ।
पुरुषको ४९ केजीमा नुवाकोटका मोहन गुरुङ र काभ्रेका धमेन्द्र राई फाइनलमा पुगे । मोहनले नक्सालका पवनबहादुर श्रेष्ठ र धमेन्द्रले तारकेश्वरका सुजन ओलीलाई पाखा लगाए । पुरुष ५२ केजीमा कोट्स्य भैरवका सुमन नेपालीले मकवानपुरका बुद्ध लामा तथा बक्समान्डुुका वाङ्दी शेर्पाले थानकोटका सुजन महर्जनलाई पराजित गर्दै उपाधि नजिक पुगे । पुरुषकै ५६ केजीमा कोट्स्य भैरवका प्रशान्त लामा र एचटुओका बुद्ध लामा फाइनलमा पुगे । प्रशान्तले नुवाकोटका प्रकाश मगर र बुद्धले धादिङका जेनिस गुरुङलाई पाखा लगाए ।
यसैगरी पुरुष ६० केजीमा नक्सालका मौसम राना र बक्समान्डुका गणेश थापा, ६४ केजीमा ६९ मा बक्समान्डुका चन्द्र तामाङ र आरडीएसका करणसिंह ठकुरी, ७५ केजीमा कोट्स्य भैरवका रुपक नेपाली र रेजका कोसिस श्रेष्ठ तथा पुरुषको ८१ केजी तौल समूहमा मेघदूतका कृष्णराज गिरी र तारकेश्वरका केशर खत्रीले फाइनलमा स्थान बनाए ।
