आर्मी र पुलिसको जित

काठमाडौं : विभागीय टोली त्रिभुवन आर्मी क्लब र नेपाल पुलिस क्लबले राष्ट्रिय महिला लिग फुटबलमा सफलता हात पारेका छन् । सातदोबाटोस्थित एन्फा कम्प्लेक्समा मंगलबार भएको खेलमा आर्मीले वालिङ नगरपालिकालाई २–० गोलले हरायो । अर्को खेलमा पुलिसले विराटनगर महानगरपालिकालाई ३–० गोलले स्तब्ध बनायो ।
आर्मीको जितमा शर्मिला थापाले खेल सुरु भएको पहिलो मिनेटमै गोलको खाता खोलेकी थिइन् । आर्मीले अर्का गोल वालिङबाट आत्मघाती उपहार पाएको थियो । बालिङकी पुष्पा गुरुङले आफ्नै पोस्ट्मा गोल गरेकी थिइन् । जितसँगै दोस्रो स्थानमा रहेको आर्मीले १६ अंक बनाएको छ । वालिङको ११ अंक छ ।
यसैगरी अर्को खेलमा पुलिसलाई जिताउन नीरु थापाले दुई तथा निर्मला उपाध्यायले एक गोल गरे । नीरुले ५७औं र ५९औं मिनेटमा गोल गरेकी थिइन् । यसअघि निर्मलाले ४१औं मिनेटमा सुरुआती गोल गरेकी थिइन् । जितसँगै पुलिसले ११ अंक बनाएको छ । विराटनगरको १० अंक छ । लिगको शीर्ष स्थानमा रहेको एपीएफको २१ अंक छ । एपीएफ लिगमा अपराजित एक्लो टोली हो ।