एउटै खेलमा २२ गोल : सावित्रा एक्लैको दर्जन गोल

काठमाडौं : विभागीय टोली एपीएफ क्लबले महिला लिग फुटबलमा गोल वर्षा गरेको छ । एन्फा कम्प्लेक्स मैदान सातदोबाटोमा आइतबार भएको खेलमा एपीएफले चौदण्डीगढी नगरपालिकालाई २२–० गोलले हरायो ।
एपीएफको जितमा सावित्रा भण्डारी एक्लैले १२ गोल गरिन् । दर्जन गोल गर्न सफल सावित्राले पहिलो हाफमै पाँच र दोस्रो हाफमा सात गोल गरेकी थिइन् । अनु लामाले पाँच, अनिता बस्नेतले तीन तथा रेनुका नगरकोटी र सरू लिम्बूले एक÷एक गोल गरे । जारी लिगमा अपराजित रहेको एपीएफको यो लगातार छैटौं जित हो । जितसँगै शीर्ष स्थानमा रहेको एपीएफले १८ अंक बनाएको छ । अंकविहीन चौदण्डीगढी अन्तिममा छ ।
अर्को खेलमा त्रिभुवन आर्मी क्लबले विराटनगर महानगरपालिकालाई ७–० गोलले हरायो । एकपक्षीय खेलमा आर्मीले पहिलो हाफमा तीन र दोस्रो हाफमा चार गोल गरेको थियो । आर्मीको जितमा शर्मिला थापाले ह्याट्रिक गरिन् । विमला चौधरीले दुई तथा रश्मि घिसिङ र विमला विकले एक÷एक गोल गरेका थिए । आर्मीकी शर्मिला थापा प्लेयर अफ दी म्याच घोषित भइन् । उनले पाँच हजार रुपैयाँ पुरस्कार पाइन् । जितसँगै आर्मी दोस्रो स्थानमा उक्लिएको छ । आर्मीले पाँच खेलबाट १० अंक बनाएको छ । सात अंक बनाएको विराटनगर चौथो स्थानमा छ ।