नेपालमाला
१० मंसिर २०७७, बुधबार 
ब्युनर्सआयर्स : अर्जेन्टिनाका दिग्गज फुटबलर डिएगो म्यारोडोनाको ६० वर्षको उमेरमा निधन भएको छ । लामो समयदेखि अस्वस्थ उनको हृदयघातका कारण निधन भएको हो ।
दुई साता अघि मात्र उनको मस्तिष्कको शल्यक्रिया गरिएको थियो । त्यसपछि उनी घरमै स्वास्थ्यलाभ गर्दै आइरहेका थिए । उनको मद्यपानका अम्बली छुटाउन पनि उपचार भइरहेको थियो ।
अर्जेन्टिनाका पूर्व प्रशिक्षकसमेत रहेका म्यारोडोना विश्व फुटबलका महान खेलाडीमा मानिन्छन् । म्यारोडोनाकै चमत्कारिक प्रदर्शनमा अर्जेन्टिनाले सन् १९८६ को विश्वकपको उपाधि जितेको थियो । यही विश्वकपको क्वार्टरफाइनलमा इङ्ल्यान्डविरुद्ध गरेको गोल ‘ह्यान्ड अफ गड’का रुपमा चर्चित बनेको थियो । उनले अर्जेन्टिनालाई सन् १९९० को विश्वकपको फाइनलमा पनि पु¥याएका थिए । त्यसबेला अर्जेन्टिना पश्चिम जर्मनीसँग पराजित भएको थियो । सन् १९९४ को विश्वकपमा पनि उनी अर्जेन्टिनी टोलमिा थिए । तर, डोपिङमा असफल भएपछि उनलाई घर फर्काइएको थियो । त्यसपछि उनी लागुऔषधमा नराम्रोसँग फसेका थिए । त्यसअघि सन् १९९१ मा लागुऔषध सेवन गरेको अभियोगमा उनी डेढ वर्ष प्रतिबन्धमा परेका थिए ।
अर्जेन्टिनाका लागि म्यारोडोनाले १९७७ देखि १९९४ सम्म खेलेका थिए । उनले अर्जेन्टिनाका लागि ९१ खेलमा ३४ गोल गरेका छन् । सन् २००८ देखि २०१० को विश्वकपसम्म म्यारोडोना अर्जेन्टिनाको मुख्य प्रशिक्षक रहेका थिए ।
म्यारोडोनाले युरोपियन क्लब बार्सिलोना, नापोली, सेभिलजस्ता युरोपका प्रतिष्ठित क्लबबाट व्यवसायिक फुटबल खेलेका थिए ।
अर्जेन्टिनोस जुनियर्सबाट व्यावसायिक फुटबल सुरुवात गरेका उनले सन् १९८१ देखि ८२ सम्म बोका जुनियर्सबाट खेलेका थिए । त्यसपछि उनी बार्सिलोनामा आवद्ध भएका थिए । उनले सन् १९८२ देखि १९८४ सम्म बार्सिलोनाका लागि ३६ खेल खेल्दै २२ गोल गरेका थिए ।
यसैगरी १९८४ देखि १९९१ सम्म इटालियन क्लब नापोलीबाट उनले फुटबल खेलेका थिए । नापोलीका लागि एक सय ८८ खेलमा ८१ गोल गरेका थिए । नापोलीबाट सेभिल पुगेका उनले त्यहाँ एक सिजन बिताएका थिए । सेभिलमा उनले २६ खेलमा पाँच गोल गरेका थिए । उनले क्लब फुटबलको अन्त्य साम १९९७ मा बोका जुनियर्सबाट गरेका थिए ।
म्याराडोनाको निधनमा अर्जेन्टिनी फुटबल संघले गहिरो दुःख व्यक्त गर्दै महान हस्तीलाई गुमाउनु परेको जनाएको छ । ‘हाम्रा महान हस्तीको निधनमा गहरिो दुःख व्यक्त गर्दछौं’, अर्जेन्टिनी फुटबलद्वारा जारी विज्ञप्तिमा भनिएको छ, ‘तिमी सदैव हाम्रो हृदयमा रहने छौं ।’
