नेपालमाला
१६ कार्तिक २०७७, सोमबार 
काठमाडौं : पछिल्लो समय नेपाल बक्सिङ संघको विवाद उत्कर्षमा छ । संघका अध्यक्ष राम अवालेले महासचिवको अधिकार खोस्ने, निर्वाचित कोषाध्यक्षलाई हटाएर कार्यबहाक कोषाध्यक्ष नियुक्ति गरी आर्थिक अनियमितता गरेको आरोप लाग्दै आएको छ । यस विषयमा न संघका नेतृत्वले चित्तबुझ्दो जवाफ दिन सकेको छ न त नियमायक निकाय राष्ट्रिय खेलकुद परिषद् र युवा तथा खेलकुद मन्त्रालयले नै चासो दिएको छ । नियमायक निकाय मौन रहँदा नेतृत्वले खुल्लमखुल्ला विधान विपरीतका कामहरु गर्दै आएको छ ।
२०७३ जेठ २२ मा राम अवालेको नेतृत्वमा संघ गठन भएको केही समयसम्म सबै कुरा राम्रोसँग चलेको थियो । अध्यक्ष अवालेले सबै साथीहरुको भावना अनुरुप नै काम गर्दै आएका थिए । तर, त्यो परम्परा लामो समयसम्म टिक्न सकेन । जसै राम अवाले पूर्व अध्यक्ष विष्णुगोपाल श्रेष्ठको सल्लाहमा चल्न थाले, संघभित्र पनि कलहको बीउ झाँगिदै गयो ।
२०७४ भदौ ३० मा दक्षिण एशियाली बक्सिङ संघ (साबा) को महासचिवमा विष्णुगोपाल श्रेष्ठ निर्वाचित भएपछि विवादले उग्र रुप लिन पुग्यो । भारतीय बक्सिङ संघका अध्यक्ष अजय सिंह निर्विरोध रुपमा साबाको अध्यक्षमा चयन हुँदा राम अवाले उपाध्यक्ष, विष्णुगोपाल महासचिव र संघका उपाध्यक्ष किरणबहादुर श्रेष्ठ सदस्यमा चयन भएका थिए । विष्णुगोपाल कुन आधार र हैसियतमा साबाको महासचिव बनेको भन्दै संघका अधिकांश सदस्य राम अवालेसँग रुष्ट भएका थिए ।
अझ रोचक कुरा त साबालाई अन्तर्राष्ट्रिय बक्सिङ महासंघ (आईबा) र एसियन बक्सिङ कन्फेडेरेसन (एसबीसी) ले मान्यता दिएको छैन । बक्सिङको सर्वोच्च निकायबाटै मान्यता नपाएको साबामा विष्णुगोपालले मरिहत्ते गर्नुलाई रहस्यका रुपमा हेरिएको छ ।
नेपाल बक्सिङ संघका सदस्य ओमनारायण श्रेष्ठ साबाको महासचिवमा विष्णुगोपाल चयन भएपछि संघभित्र किचलो सुरु भएको स्वीकार्छन् । ‘दक्षिण एसियाली बक्सिङ फेडरेसनको महासचिवमा पूर्व अध्यक्ष विष्णुगोपाल श्रेष्ठ चुनिएपछि विवाद बढ्दै गएको हो । विष्णुगोपाल श्रेष्ठ कुन आधारमा महासचिव हुनुभयो भन्ने विषयमा नेतृत्वले चित्तबुझ्दो जवाफ दिन नसकेपछि विवादले उग्र रुप लिएको हो’, उनी भन्छन् ।
संघभित्र विवाद बढेपछि विष्णुगोपालले नयाँ रणनीति अपनाए । २५ सदस्यीय संघमा १३ जनाको स्टेरिङ कमिटी गठन गर्ने सल्लाह राम अवालेलाई दिए । विष्णुगोपालले भने जसरी नै अवालेले स्टरिङ कमिटी बनाए । त्यही कमिटीको बलमा जथाभावी निर्णयहरु हुन थाले । उनी मानार्थ आजीवन अध्यक्ष बने भने पूर्ण कार्यसमितिको सट्टा स्टेरिङ कमिटीबाटै निर्णयहरु हुन थाले । संघको कुनै बैठक नै नबसी अवाले दाजुभाइले गरेका निर्णयमा बहुमत पु¥याउन घरघरमा पुगेर माइन्युटमा सही गराउने काम अहिले उपरान्त पनि हुँदै आएको छ । यसले पनि देखाउँछ राम अवाले कति सक्षम छन् भनेर ।
विष्णुगोपालले मानार्थ आजीवन अध्यक्षकै हैसियतमा अन्तर्राष्ट्रिय मञ्चमा पत्राचार गर्ने, विदेश भ्रमणमा पनि आफै जाने र देशभित्र पनि आफूलाई छायाँ अध्यक्षका रुपमा प्रस्तुत गर्न थाले । यो विषय सञ्चार माध्यममा आएपछि संघले विष्णुगोपाललाई मानार्थ अध्यक्षबाट हटाएको घोषणा त गरे पनि उनी भित्री रुपमा सक्रिय बनिरहे । विष्णुगोपाललाई मानार्थ आजीवन अध्यक्षको मोह कतिसम्म रहेछ भने उनले नेपाल ओलम्पिक कमिटथीअन्तर्गतको स्पोटर््स फर अल कमिसनको लेटरप्याडमा पनि यही कुरा भजाएका छन् ।
उनी साबाको महासचिव कसरी निर्वाचित भए भनेर आवाज उठाउनेहरुलाई माफी मगाउने र माफी नमाग्नेलाई खेद्ने रणनीति उनकै इशारामा राम अवालेले त्यही बेलादेखि गर्दै आएका छन् । त्यसबेला संघका केही पदाधिकारी उनकै घरमा गएर माफी पनि मागेका थिए । त्यसरी माफी माग्नेहरु नै अहिले संघमा अवाले दाजुभाइपछि सर्वेसर्वा बनिरहेका छन् । यसरी विष्णुगोपालले गिजोलेका कारण पछिल्लो समय विवादको चौघेरामा पर्ने मात्र होइन, अधोगतितर्फ पनि लागेको छ ।
