नेपालमाला
११ कार्तिक २०७७, मंगलवार 
सारजाह : किङ्स इलाभेन पन्जाबले यूएईमा जारी १३औं संस्करणको इन्डियन प्रिमियर लिग (आईपीएल) क्रिकेटमा कोलकाता नाइट राइडर्समाथि सानदार जित निकालेको छ ।
सारजाहमा सोमबार राति भएको खेलमा पन्जाबले कोलकातालाई ८ विकेटले पराजित गरेको हो । सारजाह क्रिकेट मैदानमा कोलकाताले दिएको १ सय ५० रनको लक्ष्य पन्जाबले १८ ओभर ५ बलमा मात्र २ विकेट गुमाएर पूरा गर्यो ।
पन्जावको जितमा क्रिस गेल र मन्दीप सिंहले अर्धशतकीय पाली खेले । विस्फोटक ब्याटिङ गरेका गेलले २९ बलमा ५१ रन बनाए । उनले आईपीएलमा पन्जाबका लागि १ हजार रन समेत पूरा गरे । मन्दीप ६६ रनमा अविजित रहे । यस्तै कप्तान केएल राहुलले २८ रन बनाए ।
कोलकाताका लक्की फर्गुसन र वरुण चक्रवर्तीले एकएक विकेट लिए । यस अघि टस हारेर पहिले ब्याटिङ गरेको कोलकाताले २० ओभरमा ९ विकेट गुमाएर १ सय ४९ रन बनाएको थियो ।
कोलकाताका लागि शुवमन गिलले ५७ रनको अर्धशतकीय इनिङ्स खेले । कप्तान इयोन मोर्गनले ४० रनको योगदान गरे ।
खराब सुरुवात गरेको कोलकाताका लागि गिल र मोर्गनले चौथो विकेटका लागि ८१ रनको साझेदारी गरेका थिए । लक्की फर्गुसन २४ रनमा अविजित रहे ।
कोलकातालाई सस्तैमा समेट्न पन्जाबका मोहमद शामीले २ विकेट लिए । यस्तै रवि विश्नोई र क्रिस जोर्डनले २र२ विकेट लिए । ग्लेन म्याक्स्वेल र मुरुगान आश्विनले १र१ विकेट लिए ।
यस जितसँगै पन्जाबले कोलकाताविरुद्ध अघिल्लो खेलमा बेहोरेको हारको बदला समेत लिएको छ । सिजनको पहिलो भेटमा कोलकाताले पन्जाबलाई २ रनले हराएको थियो ।
जितसँगै पन्जाब तालिकाको चौंथो स्थानमा समेत उक्लिएको छ । पन्जाबले प्ले अफ सम्भावना बलियो बनाएको छ । पन्जाबले १२ खेलमा १२ अंक जोडेको छ ।
कोलकाता भने पाँचौं स्थानमा झरेको छ । कोलकाताले पनि १२ खेलमा १२ अंक नै जोडेको छ ।
