नेपालमाला
१० भाद्र २०७७, बुधबार 
काठमाडौं : नेपाल एथलेटिक्स संघले एथलेटिक्सका कीर्तिमानी खेलाडी चन्द्रकला लामगादेमाथि गरिएको कुटपिटको घटनामा संलग्नललाई कारवाहीको माग गरेको छ । संघका अध्यक्ष राजीवविक्रम शाहले आज विज्ञप्ति जारी गर्दै खेलाडी चन्द्रकलालाई आक्रमण गर्नेलाई कानुनी दायरामा ल्याउन माग गरेका हुन् ।
चन्द्रकलालाई सोमबार राति झापाको मेचीनगर नगरपालिकाको चारआलीमा छिमेकीले आक्रमण गरेका थिए । कुटाईबाट उहाँ सख्त घाइते भएकी छन् । गर्भवती रहेकी उनको झापाको बिर्तामोडस्थित बी एन्ड सी अस्पतालमा उपचार भइरहेको छ । नेपाल पुलिस क्लबमा आवद्ध चन्द्रकला कोरोना महामारीका कारण गत चैतमा लकडाउन हुनुअघि झापा गएकी थिइन् ।
यसैबीच नेपाल एथलेटिक्स संघका अध्यक्ष शाहले लामगादेको उपचारका लागि रु २१ हजार सहयोग गरेका छन् । अध्यक्ष शाहका अनुसार चन्द्रकलालाई कुटपिट गर्नेलाई इलाका प्रहरी कार्यालय धुलाबारीले पक्राउ गरेको छ ।
यसैगरी नेपाल राष्ट्रिय तथा अन्तर्राष्ट्रिय खेलाडी संघले पनि बुधबार विज्ञप्ति जारी गर्दै लामागादेमाथि कुटपिट गर्नेलाई कडा कारवाहीको माग गरेको छ । संघका अध्यक्ष दीपक श्रेष्ठले विज्ञप्ति जारी गर्दै कारवाहीको माग गरेका हुन् ।
एथलेटिक्स खेलाडी चन्द्रकलाले पूर्वाञ्चलमा सम्पन्न सातौँ राष्ट्रिय खेलकूद र प्रदेश नं ५ मा सम्पन्न आठौँ राष्ट्रिय खेलकूदमा सटपुट र ज्याभलिनथ्रोमा स्वर्ण पदक जितेकी थिइन् । उनको नाममा आठौँ राष्ट्रिय खेलकूदमा एथलेटिक्सको सटपुटमा १२.०४ मिटर तथा ज्याभलिनथ्रोमा ४४.०४ मिटर थ्रो गरेको राष्ट्रिय कीर्तिमान छ ।
