नेपालमाला
१० पुष २०८२, बिहीबार 
काठमाडौं : शेरबहादुर खड्का स्मृति प्रतिष्ठान, बालकोटको आयोजनामा नवौं शेरबहादुर खड्का स्मृति राष्ट्रिय महिला भलिबल प्रतियोगिता पुस २३ देखि २६ गतेसम्म हुने भएको छ । प्रतियोगितामा तीन विभागीयसहित पाँच टोलीको सहभागिता रहने बिहीबार आयोजित पत्रकार सम्मेलनमा प्रतिष्ठानका अध्यक्ष रञ्जन खड्काले जानकारी दिए । प्रतियोगितामा नेपाल पुलिस क्लब, त्रिभुवन आर्मी, एपीएफ, न्यु डायमन्ड युथ स्पोर्ट्स क्लब र एभरेष्ट भलिबल क्लबको सहभागिता रहने छ । सहभागी टोलीलाई दुई समूहमा विभाजन गरी लिग कम नकआउटका आधारमा खेल खेलाइने छ ।
बहुराष्ट्रिय पेन्ट कम्पनी केएनपी नेरोलेकको मुख्य प्रायोजनमा हुने प्रतियोगिताको कुल पुरस्कार राशि १३ लाख रुपैयाँ रहेको छ । विजेताले पाँच लाख, उपविजेताले दुई लाख ५० हजार र तेस्रो हुने टोलीले एक लाख २५ हजार रुपैयाँ नगद पुरस्कार प्राप्त गर्ने छन् । विधागत रुपमा उत्कृष्ट हुनेलाई जनही २५ हजार नगदबाट पुरस्कृत गरिने छ ।
प्रत्येक खेलको ‘प्लेयर अफ द म्याच’ लाई १५ हजार नगद पुरस्कार प्रदान गरिने छ । प्रतियोगिताको उद्घाटनका अवसरमा विगतमाझैं एक राष्ट्रिय महिला खेलाडीलाई ५० हजार नगदसहित ‘शेरबहादुर खड्का स्पेसल अवार्डबाट सम्मान गरिने छ ।
प्रतियोगिताका खेलहरु त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा खेलाइने छ । सुरुका ६ संस्करणको उपाधि एपीएफले जितेको थियो । सातौंमा न्यु डायमन्ड च्याम्पियन बनेको थियो भने गत संस्करणमा नेपाल पुलिस क्लब पहिलो भएको थियो ।
पत्रकार सम्मेलनमा नेरोलेकका कन्ट्री हेड मनोज मिश्र र प्रतिष्ठानकी संरक्षक गमली खड्काले मुख्य प्रायोजनसम्बन्धी सम्झौतापत्रमा पनि हस्ताक्षर गरेका थिए । प्रतियोगितालाई राखेप, प्रदेश खेलकुद विकास परिषद्, बागमती प्रदेश, विभिन्न कर्पोरेट हाउस र पालिकाको सहयोग रहेको आयोजकले जनाएको छ ।
कन्ट्री हेड मिश्रले प्रतियोगिताको उचाईं बढेसँगै प्रतियोगिताप्रति संस्थाको माया पनि बढ्दै गएकोले बजेट विनियोजनलाई निरन्तर दिएको बताए । नेपाल भलिबल संघका अध्यक्ष जितेन्द्रबहादुर चन्दले प्रतियोगिता सफलताका लागि शुभकामना दिए । प्रतिष्ठानका अध्यक्ष खड्काले हरेक खेलाडी र टेक्निकल टिमका सदस्यको पाँच लाख रुपैयाँ बराबरको बिमा गरिएको बताए । महिला खेलाडीको सशक्तिकरण र क्षमता अभिबृद्धि गर्ने उद्देश्यसाथ प्रतिष्ठानले २०७२ सालदेखि प्रतियोगिता आयोजना गर्दै आइरहेको छ ।
