नेपालमाला
१५ मंसिर २०८१, शनिबार 
काठमाडौं : नेपाल प्रिमियर लिग (एनपीएल) को उद्घाटन खेलमा शनिबार विराटनगर किङ्स र जनकपुर बोल्ट्स भिड्दै छन् । कीर्तिपुरस्थित त्रिवि मैदानमा दिउँसो सवा १२ बाट उद्घाटन खेल सुरु हुनेछ । पहिलो दिन एक खेल मात्रै हुनेछ भने तेस्रो दिनदेखि दैनिक दुई खेल हुनेछन् ।
शुक्रबार आयोजित प्रिम्याच कन्फरेन्समा विराटनगर र जनकपुरका कप्तानले आफूहरु उद्घाटन खेलका लागि तयारी अवस्थामा रहेको बताए । छोटो समयमा पनि उत्कृष्ट तयारी गरेको जनाउँदै विराटनगरका कप्तान सन्दीप लामिछानेले आफूहरु जित्नकै लागि मैदान उत्रिने बताए । ‘हामी तयारी अवस्थामा छौं । हाम्रो तयारी पनि राम्रो भएको छ । हाम्रो टोली सन्तुलित छ’, विरानटनगरका कप्तान सन्दीप लामिछानेले भने, ‘हामी जितका लागि मैदान उत्रिने छौं ।’
यसैगरी जनकपुर बोल्टका कप्तान अनिल साहले राम्रो मैदान नभएका कारण घरेलु भूमिमा तयारी गर्न नपाए पनि काठमाडौंको तयारी उत्कृष्ट भएको बताए । ‘हामीले काठमाडौंमा आएर तयारी गरेका हौं । एउटा तयारी खेलले पनि टिममा सहयोग पु¥याएको छ’, उनले भने, ‘हाम्रो बलियो पक्ष भनेको विदेश खेलाडी हो । उहाँहरुको आगमनले टिम निकै बलियो पनि देखिएको छ । हामी जितबाट प्रतियोगिताको सुरुवात गर्न चाहन्छौं ।’
सिंगल राउन्ड रोबिनमा खेल
सिंगल राउन्ड रोबिनका आधारमा हुने एनपीएलमा लिग चरणमा कुल २८ खेल हुनेछ । लिग चरणपछि शीर्ष चारमा रहने टोली प्लेअफमा प्रवेश गर्नेछन् । जहाँ पहिलो र दोस्रो हुने टिमबीच पहिलो क्वालिफायर खेल हुनेछ । यस खेलको विजेताले सिधै फाइनलमा स्थान बनाउने छ भने तेस्रो र चौथो हुने टोलीले एलिमिनेटर खेल खेल्नेछन् । एलिमिनेटरमा पराजित हुने टोली बाहिरिँदा एलिमिनेटरको विजेता र पहिलो क्वालिफायरको पराजित टोलीबीच दोस्रो क्वालिफायर खेल हुनेछ । यसको विजेताले उपाधिका लागि प्रतिस्पर्धा गर्नेछ । एनपीएलको फाइनल खेल पुस ६ गते हुनेछ । प्रतियोगिताको खेलहरु विश्व चर्चित भारतीय टेलिभिजन च्यानल स्टार स्पोर्ट्सले प्रत्यक्ष प्रशारण गर्नेछ ।
१६ गते हुँदैन कुनै खेल
एनपीएलको पहिलो संस्करण मंसिर १५ गतेदेखि सुरु हुँदैछ । मंसिर १५ गते उद्घाटन खेल पनि हुनेछ । तर, मंसिर १६ गते दोस्रो दिन भने कुनै पनि खेल हुने छैन । मंसिर १६ गते देशभर स्थानीय निकायको उपनिर्वाचन हुँदैछ । सो दिन कीर्तिपुर नगरपालिकामा पनि उपनिर्वाचन हुँदैछ । उपनिर्वाचनमा कीर्तिपुरमा दुई वडा अध्यक्षसहित मेयर पदको पनि निर्वाचन हुँदैछ । उपनिर्वाचनमा आचारसंहिता लागु हुने र सो दिन सवारी साधन सञ्चालनसँगै अन्य गतिविधि गर्न नपाइने भएकाले मंसिर १६ मा एनपीएलका खेल नहुने क्यानका सचिव पारस खड्काले बताए । ‘उपनिर्वाचनमा आचारसंहिता लागेको हुन्छ । अझ कीर्तिपुरमै उपनिर्वाचन हुँदैछ । त्यसैले सो दिन एनपीएलका कुनै पनि खेल हुँदैन’, सचिव खड्काले भने ।
