नेपालमाला
२ बैशाख २०८१, आईतवार 
काठमाडौं : नेपाली कांग्रेसले सहकारी संस्थाको रकम हिनामिना प्रकरणमा मुछिएका उपप्रधानमन्त्री एवम् गृहमन्त्री रवि लामिछानेमाथि संसदीय छानबिन समिति गठनको माग सम्बोधन गर्नुको साटो संसद अधिवेशन अन्त्य गरेर सरकार भागेको निष्कर्ष निकालेको छ । आज बिहान बसेको कांग्रेस संसदीय दलको बैठकले सरकार जवाफदेहिताबाट भागेर गैरजिम्मेवारीपूर्वक प्रस्तुत भएको निष्कर्ष निकालेको हो । बैठकपछि कांग्रेस प्रमुख सचेतक रमेश लेखकले सरकार जवाफदेही बन्नुको साटो तानाशाही बन्न खोजेको निष्कर्ष बैठकले निकालेको बताए ।
प्रमुख सचेतक रमेश लेखकले विपक्षीले बचत रकम हिनामिनाको विषय उठाउँदा सरकारले बेवास्था गरेको उल्लेख गरे। ‘उपप्रधान एवम् गृहमन्त्री रवि लामिछानेमाथि संसदीय छानबिन समिति गठन गर्नुपर्ने मागमाथि गम्भीर र सार्थक संवाद हुनुपर्ने हो। तर संसदीय मूल्य मान्यता विपरीत अगाडि बढेको छ।’ उनले भने,‘जनताका मागका विषयमा सरकार गम्भीर हुनुपर्छ। संसदबाट भाग्न मिल्दैन। संसदीय अभ्यासलाई कमजोर बनाउन मिल्दैन।’
उनले कांग्रेसले संसद अवरुद्ध गरेको नभई सरकार नै गैह्रजिम्मेवार बन्दा अवरोध भएको उल्लेख गरे। कांग्रेस हिउँदे अधिवेशन अन्त्य गर्ने सरकारको निर्णयको घोर भर्त्सना गरेको छ।
लेखकले सरकारले संसद अधिवेशन अप्रत्यासित रुपमा स्थगित गरेको बताए। उनले भने,‘पर्याप्त समय हुँदाहुँदै हिउँदे अधिवेशनको अन्त्य गर्ने, संसदमा बहुसंख्यक सांसदहरूले उठाएका कुराप्रति सरकार जिम्मेवार नहुने विषयले नै सरकार जनताप्रति उदासिन छ भन्ने कुरा प्रष्ट भएको छ।’ गत शुक्रबार बसेको मन्त्रिपरिषद बैठकले आइतबार मध्यराति १२ बजेदेखि संसदको चालु अधिवेशन अन्त्य गर्न राष्ट्रपति समक्ष सिफारिस गरेको थियो ।
