पलेसाको प्रशिक्षणलाई राष्ट्रिय पारालिम्पिक कमिटीको सहयोग

चीनको ताइयाङमा आइतबार भएको एसियाली छनोट प्रतियोगिताअन्तर्गत के–४४ विधाको महिला ५७ केजीमुनिको तौल समूहमा पलेसाले स्वर्ण पदक जित्दै पेरिस पारालिम्पिकमा स्थान सुरक्षित गरेकी हुन्। एसियाली छनोटमा प्रत्येक स्पर्धामा पहिलो हुने खेलाडी मात्रै पेरिस पारालिम्पिकमा छनोट हुने प्रावधानअनुसार पलेसाले पेरिसको टिकट काटेकी हुन्। पलेसा पारालिम्पिकमा छनोट हुने पहिलो नेपाली पारा खेलाडी पनि बनेकी छन्। यसअघि तेक्वान्दोकै दुई खेलाडीले छनोट चरण पार गरेर ओलम्पिकमा प्रतिस्पर्धा गरेका थिए। संगीना वैद्य सन् २००४ को एथेन्स र दीपक विष्ट सन् २००८ को बेइजिङ ओलम्पिकमा छनोट चरण पार गरेर सहभागी भएका थिए।

पलेसा एसियाली पारा खेलकुदमा पदक जित्ने पहिलो र एक्लो नेपाली खेलाडी पनि हुन्। उनले चीनको हाङझावमा भएको चौथो एसियाली पारा खेलकुदमा ऐतिहासिक कांस्य पदक जितेकी थिइन्। टोकियो पारालिम्पिक २०२० मा पनि पलेसाले दुई ‘बाउट’ जितेर इतिहास रचेकी थिइन्। उनले अमेरिका र सर्बियाका खेलाडीलाई पराजित गरेकी थिइन्।

चीनको सांघाईस्थित तोङजी विश्वविद्यालयमा आर्किटेक्चर इन्जिनियरिङ अध्ययनरत पलेसा पारालिम्पिकको तयारीका लागि आइतबार नेपाल आउँदै छिन्। नेपालमा केही समय तयारी गरेपछि उनी प्रशिक्षक कविराज नेगी लामासँगै बेलायतमा विशेष प्रशिक्षण गर्ने जनाइएको छ।