त्रिकोणात्मक टीट्वेन्टी शृंखला : टस जितेर नेपाल ब्याटिङ गर्दै

काठमाडौं : नेपालले त्रिकोणात्मक टीट्वेन्टी शृंखलाको फाइनलमा नेदरल्यान्ड्सविरुद्ध टस जितेको छ । नेपालका कप्तान रोहितकुमार पौडेलले टस जितेर पहिले ब्याटिङ गर्ने निर्णय लिएका छन् । नेपालले टोलीमा कुनै परिवर्तन गरेको छैन । नेदरल्यान्ड्सले भने दुई परिवर्तन गर्ने क्रममा आर्यन दत्त र नोआ क्रोसलाई आराम दिएको छ । फ्रेड क्लासेन र शारिज अहमद टोलीमा आएका छन् ।

एसोसिएटको माथिल्लो टोली नेदरल्यान्ड्ससँग नेपालले घरेलु मैदानमा दोस्रो पटक त्रिकोणात्मक टीट्वेन्टी शृंखलाको फाइनल खेल्न लागेको हो। यसअघि नेपालले सन् २०२१ मा भएको फाइनल भिडन्तमा नेदरल्यान्ड्सलाई एक सय ४२ रनले हराउँदै उपाधि जितेको थियो। नेपालले दिएको दुई सय ३९ रनको विशाल विजयी लक्ष्य पछ्याएको नेदरल्यान्ड्स १७.२ ओभरमा ९६ रनमा समेटिएको थियो।

नामिबियासमेत सम्मिलित शृंखलाको पहिलो खेलमा नेपाल नेदरल्यान्ड्ससँग दुई रनले पराजित भएको थियो। एक सय ८५ रनको लक्ष्य पछ्याएको नेपालले निर्धारित २० ओभरमा आठ विकेट गुमाउँदै एक सय ८२ रन मात्रै बनाउन सकेको थियो। दोस्रो खेलमा भने नेपालले नेदरल्यान्ड्सलाई ६ विकेटले पराजित गरेको थियो। नेदरल्यान्ड्सले दिएको एक सय २१ रनको लक्ष्य नेपालले १५.२ ओभरमा चार विकेट गुमाएर पूरा गरेको थियो।