नेपालमाला
१४ माघ २०८०, आईतवार 
काठमाडौं : आफ्नो अमेरिका यात्रालाई लिएर राप्रपा अध्यक्ष राजेन्द्र लिङ्देनले गरेको टिप्पणीले अभिनेत्री रेखा थापा आक्रोशित बनेकी छन् । उनले अमेरिकाबाटै सामाजिक सञ्जालमार्फत लिङ्देनलाई जवाफ दिएकी छन् । स्मरणीय छ कि रेखा राप्रपाकी केन्द्रीय कार्यसम्पादन समिति सदस्य हुन् । उनी पार्टीको महाधिवेशनमा लिङदेनकै प्यानलबाट महामन्त्रीमा उठेर पराजित बनेकी थिइन् ।
लिङ्देनले हिजो एक सार्वजनिक कार्यक्रममा रेखाप्रति घुमाउरो टिप्पणी गरेका थिए । देशको दुरावस्था चित्रण गर्ने क्रममा उनले ‘एक कलाकार आफ्नो सन्तानलाई नेपाली बनाउन नचाहेर अमेरिका पुगेको’ बताएका थिए । यसलाई आफूप्रतिको कटाक्षका रूपमा बुझेर रेखा आक्रोशित बनेकी हुन् । उनले फेसबुकमा लिङदेनको नाम उल्लेख नगरी लेखेकी छन्, ‘देशको माया हुनेले आफ्नो सन्तान नेपाल फिर्ता बोलाए हुन्थ्यो ! अमेरिकामा किन राखेको ?’
राप्रपा अध्यक्ष लिङदेनकी छोरी अमेरिकामा छिन् । उनी उच्च शिक्षा अध्ययनका लागि एक वर्षअघि गएको निकट स्रोतले बतायो । ‘उहाँ पढ्नका लागि मात्रै जानुभएको हो, अध्ययन सक्नेवित्तिकै फर्किनुहुन्छ,’ लिङदेननिकट स्रोतले भन्यो । लिङदेनका दुई छोरा नेपालमै अध्ययनरत छन् ।
रेखाले पार्टीलाई जानकारी नदिई अमेरिका गएको तथा अहिले अध्यक्षविरूद्ध गरेको टिप्पणीलाई गम्भीर रूपमा लिइने पार्टीका एक नेताले बताए । ‘अध्यक्षले देशको अवस्था र प्रवृत्तिको चित्रण गर्दा उहाँको उदाहरण दिनुभएको थियो, तर उहाँले व्यक्तिगतरूपमा लिएर अध्यक्षमाथि नै खनिनु ठीक भएन’ स्रोतले भन्यो ।
यही विषयमा रेखाले स्टाटस लेख्दै राजेन्द्र लिङ्देनले चुनाव जित्न गणतन्त्रवादीको वैशाखी टेकेको आरोप लगाएकी थिइन् । ‘चुनाव जित्न गणतन्त्रवादीको वैशाखी टेक्नुपर्ने । विचारले गणतन्त्र चाहिन्न भन्ने । पद पाउनेवित्तिकै व्यवस्थाको मुद्दा भाडमा जाओस् भन्दै कुदेर गणतन्त्रवादीको आर्शिवाद लिने । अनि एकथरी मान्छेले पत्याइदिनु पर्ने हाम्रा फलानो देश प्राणभन्दा प्यारो छ भनेर । हर्केहरु’, उनले लेखेकी थिइन् ।
