सुवांगी र ओमलाई स्वर्ण

काठमाडौं : बंगलादेशमा आयोजना भएको प्रथम बंगबन्धु अन्तराष्ट्रिय तेक्वान्दो प्रतियोगितामा नेपालकी सुवांगी श्रेष्ठ र ओम भन्डारीले स्वर्ण पदक जितेका छन् । सुवांगीले जुनियर महिला ५९ केजीमुनिको तौल समूहमा श्रीलंकाकी खेलाडी केएचपीएन चतुरानीलाई पराजित गर्दै स्वर्ण पदक जित्न सफल भएकी हुन । उनले सेमिफाइनलमा बंगलादेशकी खेलाडीलाई पराजित गरेकी थिइन् ।

यसैगरी ओम भण्डारीले जुनियर ६८ केजीमुनिको तौल समूहमा सेमिफाइनलमा आयोजक बंगलादेशका खेलाडीलाई हराउँदै फाइनलमा स्थान बनाएका थिए । फाइनलमा उनले आफ्नै देशका अफेस केसीलाई हराउँदै स्वर्ण पदक जितेका हुन् । सुवांगी र ओम सीतापाइला तेक्वान्दो डोजाङका खेलाडी हुन् ।
यही अक्टोबर १९ देखि २१ सम्म बंगलादेशको ढाकामा आयोजना भएको प्रतियोगितामा आठ देशका पाँच सयभन्दा बढी खेलाडीको सहभागिता रहेको थियो । जसमा आयोजक बंगलादेशसहित श्रीलंका, भुटान, भारत, नेपाल, मलेसिया, थाइल्यान्ड र इन्डोनेसियाको सहभागिता रहेको थियो ।

यसअघि आइरा बोहराले स्वर्ण पदक जितेकी थिइन् । शुक्रबारबाट बंगलादेशको ढाकामा सुरु भएको च्याम्पियनसिपमा आइराले क्याडेट १२ मुनिको एकल पुम्सेमा स्वर्ण पदक जितेकी हुन् । आइरा स्वयम्भू तेक्वान्दो डोजाङकी खेलाडी हुन् । च्याम्पियनसिपमा सहभागी जनाउन नेपालका विभिन्न जिल्ला र डोजाङका करिब एक सय खेलाडी बंगलादेश पुगेका छन् । च्याम्पियनसिपमा नेपालका सात जना अन्तर्राष्ट्रिय निर्णायक पनि बंगलादेश पुगेका छन् ।