नेपालमाला
७ श्रावण २०८०, आईतवार काठमाडौं : स्युचाटार तेक्वान्दो डोजाङले प्रथम इलेन स्मृति जुनियर तेक्वान्दो च्याम्पियनसिपको उपाधि जितेको छ । इलेन मेमोरियल स्कुलको आयोजनामा काठमाडौंको सीतापाइलामा भएको च्याम्पियनसिपमा १८ स्वर्ण, ६ रजत र आठ कांस्यका साथ स्युचाटार टिम च्याम्पियन बनेको हो ।
यसैगरी १२ स्वर्ण, पाँच रजत र आठ कांस्य पदकका साथ जेसिस इन्टरनेसनल स्कुल दोस्रो तथा ११ स्वर्ण, १४ रजत र आठ कांस्यका साथ द च्याम्पियन तेक्वान्दो डोजाङ तेस्रो भएको विद्यालयका तेक्वान्दो प्रशिक्षक कुमार लामा घिसिङले जानकारी दिए । एकदिने प्रतियोगितामा १५ स्कुल तथा डोजाङका तीन सय ३६ छात्रछात्राले प्रतिस्पर्धा गरेका थिए । च्याम्पियनसिपमा छात्रमा १२ र छात्रामा १० तौल समूहमा प्रतिस्पर्धा भएको थियो ।
विजेतालाई नागार्जुन नगरपालिकाकी उपप्रमुख सुशीला अधिकारी, इलेन स्कुलकी व्यवस्थापन समितिकी अध्यक्ष सपना तुलाधर, प्रधानाध्यापक जयराम चापागाईं, प्रतियोगिता संयोजक चक्रबहादुर विष्ट, नेपाल तेक्वान्दो संघका केन्द्रीय सदस्य बब्लु सिवाकोटी, कुमार लामा घिसिङ, काठमाडौं जिल्ला तेक्वान्दो संघका अध्यक्ष विक्रम खड्गी, उपाध्यक्ष सुरेन्द्र डंगोल, सचिव गौरव रजकलगायतले पुरस्कार प्रदान गरेका थिए ।
