नेपालमाला
३१ असार २०८०, आईतवार 
काठमाडौं : नेपाल ट्रेड युनियन कांग्रेसले श्रमिकलाई जिउन पुग्नेगरी ज्याला वृद्धि गर्नुपर्ने माग गर्दै दबाबुमुलक प्रदर्शन गरेको छ । आइतबार काठमाडौंको माइतीघरमा भेला भएर नेपाल ट्रेड युनियन कांग्रेसले नयाँ बानेश्वरसम्म दबाबमुलक प्रदर्शन गरेको हो ।
श्रम आयोग गठन हुनुपर्ने, नीति निर्माण तहमा श्रमिकको प्रतिनिधित्व हुनुपर्ने, अनौपचारिक तथा स्वरोजगार श्रमिकलाई सामाजिक सुरक्षामा जोड्नुपर्ने र श्रमिकलाई स्थानीय तहमा पञ्जिकरण गर्न माग गर्दै आइतबार प्रदर्शन गरिएको नेपाल ट्रेड युनियन कांग्रेसकी उपमहासचिव रुकमणि थापा (अर्चना)ले जानकारी दिइन् ।
अहिलेको बढ्दो महँगीमा श्रमिकको पारिश्रमिक न्युनतम् २५ हजार नभए श्रमिकले जीवन नै धान्न नसक्ने भएकाले संगठनले विगत केही समयदेखि दबाबमुलक कार्यक्रम सञ्चालन गर्दै आएको उपमहासचिव थापाले जानकारी दिइन् । ‘श्रमिकको न्युनतम पारिश्रमिक कम्तीमा २५ हजार बनाउनका लागि स्थानीय तह र प्रदेश सरकारमा ज्ञापन पत्र बुझाइसकेका छौं । केन्द्र सरकारलाई पनि ध्यानाकर्षण गराउन दबाबमुलक कार्यक्रम सञ्चालन गरिएको हो’, उपमहासचिव थापाले भनिन्, ‘यो कार्यक्रममा एक हप्तादेखि निरन्तर रुपमा सञ्चालन भइरहेको छ ।’ आइतबार नै श्रम, रोजगार तथा सामाजिक सुरक्षामन्त्री शरतसिंह भण्डारीलाई ज्ञापनपत्र बुझाएको उपमहासचिव थापाले जानकारी दिइन् ।
