नेपालमाला
१८ असार २०८०, सोमबार 
काठमाडौँ : निर्वाचन आयोगले चुनावमा कुनै पनि उम्मेदवारलाई भोट दिन्नँ भन्ने व्यवस्था राख्न प्रस्ताव अघि बढाएको छ । आयोगले त्यसका लागि मतपत्रमा कुनै पनि उम्मेदवारलाई भोट दिन्नँ भन्ने व्यवस्था गर्नुपर्ने र त्यसका लागि ‘नोटा’ संकेत राख्नुपर्ने प्रस्ताव गरेको हो ।
आयोगको सोमबारको बैठकले साविकको निर्वाचनसम्बन्धी कानुनमा परिमार्जन गरी ‘निर्वाचनसम्बन्धी कानुनलाई संशोधन र एकीकरण गर्न बनेको विधेयक’ लाई गृह मन्त्रालयमार्फत संसद्मा पेस गर्ने निर्णय गरेको छ । उक्त विधेयकमा कुनै पनि उम्मेदवारलाई भोट दिन्न भन्ने संकेत राख्न प्रस्ताव गरिएको छ ।
‘कुनै मतदाताले कुनै पनि उम्मेदवारलाई समर्थन नरहेको भनी मतदान गर्न चाहेमा आयोगले त्यस्तो उम्मेदवारलाई समर्थन नरहने गरी मतपत्रमा मतदानको व्यवस्था (नोटा) गर्ने,’ आयोगका प्रवक्ता शालिग्राम शर्मा पौडेलले विधेयकमा गरिएको व्यवस्थाबारे भने, ‘मतपत्र गणना गर्दा कुनै पनि उम्मेदवारलाई समर्थन नरहेको मतसंख्या (नोटा) त्यस्तो निर्वाचनमा मतदान भएको कूल सदर मतको ५० प्रतिशतभन्दा बढी भएमा त्यस्तो निर्वाचन रद्ध हुने ।’
हालसम्मका निर्वाचनमा कुनै पनि उम्मेदवारलाई भोट दिन्न भन्ने व्यवस्था छैन । कुनै पनि निर्वाचनमा सहभागी हुनेले कुनै न कुनै उम्मेदवारलाई भोट दिनैपर्ने बाध्यता रहेकोमा आगामी दिनमा त्यसलाई हटाउन आयोगले नयाँ कानुनी व्यवस्था अघि सारेको हो ।
