नेपालमाला
२१ आश्विन २०७९, शुक्रबार 
लन्डन : अजेन्टिनाका फुटबल स्टार लियोनल मेसीले आगामी महिना कतारमा आयोजना हुने सन् २०२२ को विश्वकप आफ्ना लागि अन्तिम हुने बताएका छन् । ईएसपीएनसँग कुरा गर्दै मेसीले आगामी विश्वकप आफ्ना लागि अन्तिम हुने बताएका हुन् । फ्रेन्च क्लब पेरिस सेन्ट जर्मेन –पीएसजी) का स्ट्राइकर मेसीले अर्जेन्टिनाबाट चार विश्वकप खेलेका छन् । उनले १९ खेलमा ६ गोल गर्नुका साथै पाँच असिस्ट गरेका छन् । सन् २०१४ मा आफ्नो कप्तानीमा अर्जेन्टिनालाई विश्वकपको उपविजेता बनाएका मेसीले सन् २०२१ मा कोपा अमेरिकाको उपाधि दिलाएका थिए ।
‘कतार विश्वकप निश्चित रुपमा मेरा लागि अन्तिम विश्वकप हो’, ईएसपीएनसँग कुरा गर्दै मेसीले भने, ‘म विश्वकप कहिले सुरु हुन्छ भनेर दिनगन्ती गरिरहेको छु । विश्वकप नजिकिँदै गर्दा उत्साहसँगै चिन्ता पनि बढिरहेको छ ।’ सन् २००५ मा अर्जेन्टिनाबाट डेब्यु गरेका मेसीले राष्ट्रका लागि १६४ खेल खेलेका छन् । जसमा उनले ९० गोल गरेका छन् । कतार विश्वकपमा मैदानमा उत्रिएसँगै मेसीले डियगो म्याराडोना र जेभियर मास्केरानोको नाममा रहेको सर्वाधिक विश्वकप खेल्ने खेलाडीको कीर्तिमान भंग गर्ने छन् ।
अन्तर्राष्ट्रिय फुटबल महासंघ (फिफा) को पछिल्लो वरीयतामा अर्जेन्टिना तेस्रो स्थानमा छ । नोभेम्बर २० बाट सुरु हुने विश्वकपमा अर्जेन्टिना समूह ‘सी’मा छ । यस समूहमा अर्जेन्टिनासँगै साउदी अरेबिया, मेक्सिको र पोल्यान्ड छन् । ‘विश्वकपका सबै खेल कठिन हुन्छन् । त्यसैले विश्व फुटबलको महासंग्राममा जुनसुकै नतिजा पनि आउन सक्छ’, मेसीले भनेका छन्, ‘हामीले चाहेजस्तो संधै जित नै हात पारिन्छ भन्ने हुन्न । तर, विगतको इतिहासका कारण अर्जेन्टिना सबैको रोजाईको टिम बन्ने गरेको छ ।’
मेसीले कतार विश्वकप आफ्ना लागि अन्तिम हुने बताए पनि फुटबलबाट सन्न्यास कहिले लिने भन्ने चाहिँ खुलाएका छैनन् । कतार विश्वकपपछि अर्को विश्वकप हुँदा मेसी ३९ वर्षका हुनेछन् । त्यही कारण सन् २०२२ को विश्वकप नै आफ्ना लागि अन्तिम हुने घोषणा गरेको अनुमान धेरैको छ ।
