काठमाडौं : अहिले सिंगो मुलुक स्थानीय निकायको चुनावमा होमिएको छ । आगामी वैशाख ३० गते हुने निर्वाचनका लागि उम्मेदवारहरु मतदाताको घरदैलोमा पुगिरहेका छन् । जनताको घरदैलोमा मत भाग्दै हिंड्ने क्रममा केही उम्मेदवारहरुले आफ्नो गाउँ, नगर र समुदायको विकासका लागि दीर्घकालिन र परिपक्व योजनासहित प्रस्तुत भएका छन् । तिनैमध्येकी एक हुन्, रजनी थापा । टोखा नगरपालिकामा नेपाली कांग्रेसको तर्फबाट नगर प्रमुखको उम्मेदवार बनेकी रजनीले नगरको विकासमा अघिसारेकी दीर्घकालिन र परिपक्व योजना एवं स्पष्ट वक्ताका कारण चर्चा कमाइरहेकी छन् ।
रजनी विगत लामो समयदेखि राजनीति र समाजसेवामा अहोरात्र खटिँदै आएकी जुझारु युवा हुन् । अघिल्लो स्थानीय तहको निर्वाचनमा टोखा नगरपालिकाको उपप्रमुखमा जम्मा ५१ मतले पछि परेकी रजनीको समाज सेवाप्रतिको लगाव, इमान्दारिता र इच्छाशक्तिका कारण नै नेपाली कांग्रेसले उनलाई नगर प्रमुखको उम्मेदवार बनाएको हो । आफू राजनीतिक रुपमा नेपाली कांग्रेससँग आवद्ध भए पनि जात, धर्म, लिङ्ग, वर्ण संप्रदाय र विचारलाई नहेरी समग्र टोखावासीको सेवामा समर्पित हुने प्रतिवद्धता रजनीले जनाउँदै आएकी छन् । ‘मैले समाजसेवा हिजो पनि गरेकै थिएँ । भोलि पनि गर्नेछु । तर, एउटा जनप्रतिनिधिका रुपमा सेवा गर्न म मेयरको उम्मेदवार बनेकी हुँ’, रजनी भन्छिन् ।
स्वास्थ्य, शिक्षा र युवाहरूलाई रोजगारी विशेष प्राथमिकतामा राखेर टोखा नगरपालिकाको मेयरमा उठेकी रजनी थापाले राज्यबाट सेवा सुविधाको नाममा एक पैसा पनि नलिने घोषणा गरेकी छिन् । ‘म कुनै सुविधा लिन उम्मेदवार बनेको होइन, टोखा नगरपालिकालाई योगदान दिन मेयरमा उम्मेदवारी दिएको हुँ’, उनी भन्छिन्, ‘मेयरको हैसियतमा राज्यबाट पाउने कुनै किसिमको सेवा सुविधा लिने छैन । आफूले पाउने सेवा सुविधा पनि नगरकै विकासमा लगाउने छु ।’
रजनी सचेतना नेपाल फाउन्डेसनकी अध्यक्ष समेत रहेकी उनी टोखा नगरपालिका आफ्नो घरजस्तै भएकाले घरबाट लिनेभन्दा घरका लागि सेवा दिने धारणा राख्छिन् । रजनी सचेतना नेपाल फाउन्डेसनमार्फत सयौं वृद्ध–वृद्धाको आँखामा ज्योति फर्काइदिएकी उनले टोखाको इतिहास, कला, संस्कृति, परम्परा सभ्यता, संस्कार र समृद्धिको ज्योति छर्ने योजना बुनेकी छन् । हरित सहर टोखा नगर भन्ने मुख्य संकल्पसहित टोखा नगरपालिकाको मुहार फेर्न तम्सिएकी उनी टोखालाई स्वच्छ र हराभरा नगरमा रुपान्तरण गर्ने सपना राखेकी छन् ।
रजनी टोखामा मात्रै होइन, बौद्विक तथा प्राज्ञिक परिपक्वता, समाज सेवाप्रतिको प्रतिवद्धताले देश विदेशमा पनि आफ्नो परिचयलाई स्थापित गर्न सफल भएकी छन् । परिपक्वता र युवा जोशकै कारण रजनी टोखामा नेपाली कांग्रेसको मात्रै नभएर अन्य राजनीतिक दलका नेता कार्यकर्ताको समेत रोजाइमा पर्दै आएकी छन् । त्यसैले चुनाव प्रचारका क्रममा जहाँजहाँ पुग्छिन्, कुनै राजनीतिक दलको प्रतिनिधिभन्दा पनि आफ्नै छोरी÷चेलीका रुपमा उनले सबैको माया, सद्भाव र आशिर्वाद पाइरहेकी छन् ।
टोखा नगरपालिका–३ स्थायी घर भएकी रजनी थापाको क्रियाकलाप मात्र होइन, संलग्नता हेर्दा उनी बहुमुखी प्रतिभाकी धनी हुन् । नेपाल जेसिजको राष्ट्रिय उपाध्यक्ष भएर काम गरिसकेकी रजनी लाइन्स क्लब काठमाडौं देउराली धापासीकी अध्यक्ष पनि हुन् । फ्लाट प्लगको सद्भावना दूत रहेकी रजनी नेपाल मौरिसस बिजनेस काउन्सिलको कोषाध्यक्ष, सिँगटी हाइड्रो पावरको सञ्चालक सदस्य, रजनी स्टार प्रालिको अध्यक्ष, रजनी सचेतना नेपाल फाउन्डेसनकी प्रमुख, राष्ट्रिय गोजुरियो कराते डो संघकी सचिव पनि हुन् ।
उनले रजनी सचेतना नेपाल फाउन्डेसनमार्फत महिला जागरण, सचेतनादेखि महिला सुरक्षाको विषयमा देशव्यपाी रुपमा आफै कार्यक्रम सञ्चालन गर्दै आएकी छन् । महाभूकम्पको समयमा विपत्तिमा परेका नागरिकको सेवादेखि कोभिड–१९ को महामारीमा समस्यामा परेका नागरिकको सेवामा उनी अहोरात्र खटिन् ।
गृह विज्ञान, राजनीति शास्त्र र जनप्रशासन प्रशासनमा स्नातकोत्तर गरेकी रजनीले अन्तर्राष्ट्रिय सम्बन्ध र कुटनीतिमा विद्यावारिधि गरिरहकेकी छन् । यस्तै एलएलबी र पीसीएल नर्सिङसमेत अध्ययन गरेकी छन् ।