नेपाल अपराजित रहँदै फाइनलमा

काठमाडौं : नेपालले त्रिकोणात्मक अन्तर्राष्ट्रिय टीट्वेन्टी शृंखलामा आफ्नो अपराजित यात्रा कायमै राखेको छ । यसअघि नै फाइनलमा स्थान बनाइसकेको नेपालले शनिबार भएको खेलमा मलेसियालाई ८५ रनले पराजित गर्दै अपराजित यात्रा कायम राखेको हो । नेपालले समूह चरणका चार वटै खेलमा जित निकाल्न सफल भयो ।
शनिबार कीर्तिपुरस्थित त्रिवि क्रिकेट मैदानमा दुई सय २४ रनको विशाल लक्ष्य पछ्याएको मलेसियालाई एक सय ३८ रनमा रोक्दै नेपालले फराकिलो जित निकालेको हो । जित्नै पर्ने दबाबमा रहेको मलेसियाले १९.५ ओभरमा एक सय ३८ रन मात्रै बनाउन सक्यो ।
मलेसियाका विरनदीप सिंहले सर्वाधिक ४७ रन बनाए । आक्रामक ब्याटिङ गरेका उनले २६ बलमा नौ चौका हिर्काए । यस्तै कप्तान अहमद फैदले ३३, अ‍ैलुन हफिजले १८ र सैयद अजिजले १७ रन बनाए । नेपालका कप्तान सन्दीप लामिछानेले तीन विकेट लिए । यस्तै कमलसिंह ऐरी र दीपेन्द्रसिंह ऐरीले दुई÷दुई तथा कुशल भुर्तेल र रोहितकुमार पौडेलले एक विकेट हात पारे ।

यसअघि टस हारेर पहिले ब्याटिङ गरेको नेपालले निर्धारित २० ओभरमा पाँच विकेट गुमाएर दुई सय २३ रन बनायो । नेपालका दीपेन्द्रसिंह ऐरीले शतकीय पालि खेले । आक्रामक ब्याटिङ गरेका उनले ५७ बलमा ६ छक्का र १० चौकाको मद्दतमा एक सय १० रन बनाए । उनी टीट्वेन्टी र एकदिवसीय क्रिकेटमा शतक पूरा गर्ने दोस्रो नेपाली खेलाडीसमेत बने ।
यसैगरी रोहितकुमार पौडेलले पनि अर्धशतक बनाए । उनले ३४ बलमा ५१ रन बनाए । टीट्वेन्टी क्रिकेटमा उनको पहिलो अर्धशतक हो । यस्तै आसिफ शेखले १८, अदिल अन्सारीले १४ र कुशल भुर्तेल १२ रन बनाए । मलेसियाका मोहमद वाफिक, पवनदीप सिंह, स्याज्रुल इद्रुस र मोहमद अमिरले एक÷एक विकेट लिए । नेपालले अब उपाधिका लागि सोमबार पपुवा न्युगिनीसँग खेल्नेछ । नेपालले चार खेलमा आठ अंक जोड्यो । पुपुवा न्युगिनी र मलेसियाको दुई÷दुई अंक भए पनि रनरेटका आधारमा पपुवा न्युगिनी फाइनलमा पुगेको हो ।