नेपालमाला
२९ माघ २०७८, शनिबार 
काठमाडौं : नेपाली कांग्रेसको बाँकी रहेका १६ जिल्लाको अधिवेशन फागुन १३ गते हुने भएको छ । नेपाली कांगेस केन्द्रीय कार्य सम्पादन समितिको शुक्रबार बसेको बैठकले बाँकी जिल्लाहरुको अधिवेशन फागुन १३ गते गर्ने निर्णय गरेको पार्टीका प्रवक्ता डा. प्रकाशशरण महतले बताए ।
यसअघि १५ माघमा तय भएको जिल्ला अधिवेशन कोरोना महामारीका कारण स्थगित गरिएको थियो । कांग्रेसको सप्तरी, सिरहा, धनुषा, महोत्तरी, सर्लाही, रौतहट, बारा, पर्सा, सिन्धुली, मकवानपुर, सिन्धुपाल्चोक, चितवन, नवलपुर, बाँके, कैलाली र अछाम जिल्लाको अधिवेशन हुन बाँकी छ ।
बिहीबार सुरु भएको बैठकमा शुक्रबार पनि नेताहरुले स्थानीय तहको निर्वाचन, एमसीसी, सत्तारुढ गठबन्धनलगायतको विषयमा धारण राखेका नेता अर्जुन नरसिंह केसीले बताए ।
उनले आफूले एमसीसीको विषयमा स्थानीय स्तरसम्म नकारात्मक धारणा विकास भएकाले संसदमा भएका सबै दलबीच सहमति कायम गरेर अघि बढ्नु उचित हुने बताए ।
त्यस्तै केपी शर्मा ओली नेतृत्वको सरकारको पालामा सार्वजनिक भएका भ्रष्टाचार काण्डको छानबिन गर्न उच्च स्तरीय समिति गठनको माग गरेको पनि केसीले बताए ।
शुक्रबारको बैठकमा केन्द्रीय कार्यसम्पादन समितिका सदस्यहरु प्रकाशमान सिंह, कृष्णप्रसाद सिटौला, अर्जुननरसिंह केसी, डा. शेखर कोइराला, बालकृष्ण खाँण, ज्ञानेन्द्रबहादुर कार्की, सुजाता कोइराला र जीवनबहादुर शाहीले धारणा राखेका थिए । अब बैठक आइतबार दिउँसो २ बजे बस्नेछ ।
