नेपालमाला
१८ माघ २०७८, मंगलवार 
काठमाडौं : अफ्रिकी मुलुक मौरिससविरुद्धको दोस्रो मैत्रीपूर्ण खेलमा पनि नेपालले जित निकालेको छ । त्रिपुरेश्वरस्थित दशरथ रंगशालामा मंगलबार भएको तनावपूर्ण खेलमा नेपालले मौरिससलाई १–० गोलले पराजित गरेको हो ।
खेलको १०औं मिनेटमा सुजल श्रेष्ठको गोलले नेपालले अग्रता बनाएको थियो । पुजन उपरकोटीले उपलब्ध गराएको पासलाई सदुपयोग गर्दै सुजलले गोल गरेका थिए । खेलको १३औं मिनेटमा मौरिससका कप्तान एन्डी सोफीले पेनाल्टीमा गोल गर्न चुकेका थिए । उनको प्रहार नेपालका कप्तान तथा गोलरक्षक किरण चेम्जोङले विफल पारेका थिए । नेपालका दिनेश राजवंशीले मौरिससका खेलाडीलाई फल गरेपछि पेनाल्टीको अवसर पाएको थियो । खेलमा नेपालका पुजन उपकोटी र मौरिससका दुई खेलाडीले रातो कार्ड पाएका थिए ।
यसअघि शनिबार भएको पहिलो मैत्रीपूर्णमा नेपालले मौरिससलाई १–० गोलले पराजित गरेको थियो । नेपालको जितमा विमल घर्तीमगरले निर्णायक गोल गरेका थिए ।
