नेपालमाला
८ पुष २०७८, बिहीबार 
काठमाडौं : काठमाडौं टिम च्याम्पियनसिप कर्पोरेट ब्याडमिन्टनमा निकै ठूलो विवाद भएको छ । आयोजक काठमाडौं ब्याडमिन्टन एकेडेमीले खेलाडीले पाउनुपर्ने कुनै पनि सेवा सुविधा नदिएपछि खेलाडीहरु आक्रोसित बनेका थिए । त्यही कुरा एक खेलाडीले सामाजिक सञ्जालमा लेखेका थिए ।
च्याम्पियनसिपको विरोधमा सामाजिक सञ्जालमा लेखेको भन्दै आयोजक काठमाडौं ब्याडमिन्टन एकेडेमीका दीपक थापाले खेलिरहेका खेलाडीलाई कोर्टबाटै तानेर केरकार गर्दै स्टाटस डिलिट गर्न दबाब दिएका थिए ।
दशरथ रंगशालाको कभर्ड हलमा जारी काठमाडौं टिम च्याम्पियनशिप को दोस्रो दिन बुधबार सो विवाद भएको हो।
नेपाली वरियताक्रममा चौथो स्थानमा रहेका नेपाल एपीएफ क्लबका पुरुष खेलाडीले सामाजिक सञ्जालमा स्टाटस लेखेपछि विवादले उग्र रुप लिएको हो । कान्तिपुर पब्लिकेसनबाट खेलिरहेका साजनकृष्ण ताम्राकारले खेलका क्रममा पाउनुपर्ने सुविधा नपाएपछि असन्तुष्टी जाहेर गरेका थिए ।
बुधबारको खेल शुरु हुनु अघि साजनलाई कोर्टमा बोलाइए पनि ब्याडमिन्टन संघका सदस्य समेत रहेका थापाले स्टाटस डिलिट नगरेसम्म उनलाई खेल खेल्नबाट रोक्ने धम्की दिएपछि सहभागी खेलाडीहरुले प्रतियोगिताबाट नै वाक आउट गर्ने जनाएपछि थापा पछि हटेका थिए ।
विवादले उग्र रुप लिएपछि नेपाल ब्याडमिन्टन संघका अध्यक्ष रामजीबहादुर श्रेष्ठले सहजीकरण गर्दै विवाद साम्य पारेका थिए । उनले खेलाडीको गुनासो सुन्ने प्रतिवद्धता जनाउँदै आगामी दिनमा यस्तो गल्ती नदोहो¥याउने बाचा गरेका थिए ।
कुमारी बैंकको मुख्य प्रायोजन रहेको प्रतियोगितामा सहभागी टोलीले दुई लाख रुपैयाँ इन्ट्री फ्रि बुझाएका थिए । महंगो फि लिएर पनि खेलाडीलाई पानीलगायतका कुनै पनि सुविधा नदिएपछि खेलाडीहरु आक्रोसित बनेका थिए ।
