नेपालमाला
२० मंसिर २०७८, सोमबार 
काठमाडौं : बहराइनको मानमामा आयोजना भएको एसियन युथ पारा गेम्समा तेक्वान्दो खेलाडी पलेसा गोवद्र्धनले स्वर्ण पदक जितेकी छन् ।
के–४४ विधाको ५७ केजीमुनि तौल समूहमा प्रतिस्पर्धा गरेकी पलेसाले फाइनलमा इरानी खेलाडी इब्राहिमी रोजालाई ६–० ले पराजित गर्दै स्वर्ण जितेकी हुन् । टोकियो पारा ओलम्पियन पलेसाले बाई पाउँदै फाइनलमा स्थान बनाएकी थिइन् ।
यसैगरी सिर्जना घिसिङले रजत र विशाल गर्बुजाले कांस्य पदक जिते । के–४४ कै ५२ केजीमुनि प्रतिस्पर्धा गरेकी सिर्जना फाइनलमा इरानी खेलाडीसँग पराजित भएकी थिइन् । एकपक्षीय खेलमा इरानी खेलाडी घनबारीकोमिसानीसँग उनी १८–० ले पराजित भएकी थिइन् ।
यसैगरी पुरुषको ५८ केजीमुनिको तौल समूहमा प्रतिस्पर्धा गरेका विशाल सेमिफाइनलमा उज्वेकिस्तानका खेलाडीसँग पराजित भएका थिए । पहिलो अन्तर्राष्ट्रिय प्रतियोगितामा सहभागिता जनाएका विशाल उज्वेकिस्तानका सोनाजारोभ कुद्राटिलोसँग ३२–६ ले पराजित भएका थिए ।
एसियन युथ पारा गेम्सको ब्याडमिन्टनमा प्रतिस्पर्धा गरेका प्रकाश अधिकारी भने पुरुष एकलको क्वार्टरफाइनलमा पुगेका छन् । चार खेलाडीसहित ६ सदस्यीय नेपाली टोली अहिले बहराइनमा छ । प्रशिक्षकमा अन्तर्राष्ट्रिय लेभल–२ पारा तेक्वान्दो प्रशिक्षक कविराज नेगी लामा र व्यवस्थापकमा राष्ट्रिय खेलकुद परिषद्की कार्यकारी बोर्ड सदस्य नन्दा बस्याल छिन् ।
