नेपालमाला
२६ कार्तिक २०७८, शुक्रबार 
काठमाडौं : नेपालीमा एउटा उखान छ, ‘गोरु बेचेको साइनो’ । यही उखानलाई नेपाली खेलकुदमा चरितार्थ गर्ने काम गरेको छ, नेपाल बक्सिङ संघले । माओवादी केन्द्रका अध्यक्ष पुष्पकमल दाहाल ‘प्रचण्ड’ पुत्र स्व. प्रकाश दाहालको नेपाली बक्सिङसँग न कुनै साइनो थियो न त खेलकुदसँग नै छ । एक युवाका हिसावले उनमा थोरबहुत खेलकुदको ज्ञान थियो । उनी नेपाली खेलकुदसँग केही अपडेट थिए । त्यो बाहेक प्रकाश दाहाल र नेपाली खेलकुदको कुनै साइनो थिएन । अझ बक्सिङ र प्रकाश दाहालको सम्बन्ध विपरीत ध्रुवजस्तै थियो । न बक्सिङले उनलाई चिन्थ्यो न त उनले नै बक्सिङलाई चिन्थे ।
तर, राष्ट्रिय तथा अन्तर्राष्ट्रिय खेलकुद र बक्सिङसँग कुनै साइनो नै नभएका स्व. प्रकाश दाहाललाई भजाएर आफ्नो अभिष्ठ पूरा गर्ने अभियानमा लागेको छ, नेपाल बक्सिङ संघ र तिनका केही मतियार । नेता र तिनका परिवारलाई भजाएर आफ्नो स्वार्थ सिद्ध गर्न पल्केका संघका केही पदाधिकारीले सिंगो बक्सिङ संघलाई बन्धक बनाएर बक्सिङसँग कुनै साइनो नभएका प्रकाश दाहालको नाममा प्रतियोगिता नै आयोजना गर्न लागेको छ ।
यही कात्तिक २९ गतेबाट सुरु हुन लागेको प्रतियोगिता नेपाली बक्सिङको विकास र विस्तारका लागि भन्दा केही व्यक्तिको स्वार्थसिद्धि र पैसा कमाउने मेसोका लागि मात्र भएको संघका एक पदाधिकारीले बताए । ‘प्रकाश दाहालसँग नेपाली बक्सिङको कुनै साइनो छ जस्तो मलाई लाग्दैन । बक्सिङसँग कुनै साइनो नै नभएका व्यक्तिका नाममा प्रतियोगिता गर्नुको एउटै उद्देश्य केही व्यक्तिको स्वार्थसिद्धि नै हो’, ती पदाधिकारीले भने । उनले केही व्यक्तिको दबाब र प्रभावमा संघका अध्यक्ष राम अवाले मतियार बनिरहेको बताए ।
उनले प्रकाश दाहालको स्मृतिमा संघले प्रतियोगिता आयोजना गर्नुको औचित्य पुष्टि गर्नसक्नु पर्ने दाबी पनि गरे । ‘प्रकाश दाहाल र नेपाल बक्सिङ संघबीचको सम्बन्ध के थियो ? नेपाली बक्सिङको विकासमा उनले के–कस्ता योगदान पु¥याएका थिए भनेर संघले पुष्टि गर्न सक्नुपर्छ’, ती पदाधिकारीले भने, ‘होइन भने कसैको लहैलहै र अभिष्ठ पूर्तीका लागि प्रतियोगिता नै किन आयोजना गरिँदैछ । यसको जवाफ नेतृत्वले दिनु पर्दछ ।’
उनले नेपाली बक्सिङको विकास र विस्तारमा महत्वपूर्ण योगदान पु¥याएका थुप्रै व्यक्तिहरु हुँदाहुँदै राजनीतिक अभिष्ठताका लागि कोही कसैको नाममा प्रतियोगिता आयोजना गर्नु नेतृत्वको नालायकीपन भएको बताए ।
प्रकाश दाहालको स्मृतिमा दोस्रो पटक प्रतियोगिता आयोजना हुन लागेको हो । यसअघि पहिलो संस्करण आयोजना गरेको संस्थाले प्रकाश दाहाल र उनका बुवा प्रचण्डको नाम भजाएर लाखौं रुपैयाँ कुम्ल्याएपछि प्रचण्डले सो संस्थालाई आयोजना गर्न नदिने भएपछि केही व्यक्तिको प्रभाव र दबाबमा बक्सिङ संघले आयोजनाको जिम्मा लिएको ती पदाधिकारीले बताए ।
उनले अध्यक्ष राम अवाले र सिंगो बक्सिङ संघ केही व्यक्तिको गोटी बनेको भन्दै यसको हिसावकिताव आगामी अधिवेशनमा खोज्नुपर्ने बताए । ‘नेपाली बक्सिङको श्रीवृत्तिका लागि थुप्रै बक्सरहरुले योगदान पु¥याएका छन् । उनीहरुको नाममा नभएर नेपाली बक्सिङ र संघका लागि कुनै योगदान नै नदिएका व्यक्तिको नाममा प्रतियोगिता आयोजना गर्नुको औचित्य के ?’, उनले प्रतिप्रश्न गर्दै भने, ‘आफूलाई फाइदा हुन्छ भनेर नेतृत्वले जे पनि गर्ने छुट छ ? नेतृत्वले विधिविधान, नियम र कानुन मान्नु पर्दैन ? यसको हिसाबकिताव पक्कै पनि खोज्नुपर्छ । र खोजिने पनि छ ।’
