नेपालमाला
१३ आश्विन २०७८, बुधबार 
काठमाडौं : रसियाको मस्कोमा आयोजना हुने ¥याङकिङ प्रतियोगितासमेत रहेको करातेको प्रिमियर लिगमा प्रतिस्पर्धा गर्न गएकी अनु अधिकारीलाई मंगलबार बिदाइ गरिएको छ । १३औं दक्षिण एसियाली खेलकुद (साग) की स्वर्णधारी अनुलाई राष्ट्रिय खेलकुद परिषद्का सदस्यसचिव रमेशकुमार सिलवालले बिदाइ गरेका हुन् ।
सदस्यसचिव सिलवालले प्रतियोगिताले नेपाली खेलाडीहरुको स्तर मापन गर्ने र नेपाललाई विश्व खेल मञ्चमा परिचय गराउने भएकाले उत्कृष्ट प्रदर्शनका लागि शुभकामना दिएका थिए ।
विश्वका चर्चित खेलाडीहरुको सहभागिता रहने प्रतियोगितामा अनुले ५५ केजीमुनिको तौल समूहमा प्रतिस्पर्धा गर्ने छिन् । प्रत्येक तौल समूहमा ६४ जनाले मात्र प्रतिस्पर्धा गर्न पाउने अनुले जानकारी दिइन् । उनी अहिले १६३औं स्थान छिन् । लिगमा उत्कृष्ट १० स्थान हासिल गर्ने खेलाडीहरु ओलम्पिकका लागि छनोट हुने छन् । प्रिमियर लिग आगामी ओलम्पिकको सुरुवाती छनोट पनि हो ।
अक्टोबर १ देखि ३ तारिखसम्म आयोजना हुने प्रिमियर लिगमा प्रतिस्पर्धा गर्न अनु एक्लै जान लागेकी हुन् । प्रशिक्षकले व्यक्तिगत खर्च बेहोर्न नसक्ने भएपछि उनी मात्रै रसिया जान लागेकी हुन् । अनु पनि आफ्नै खर्चमा त्यसतर्फ गएकी हुन् । ‘राष्ट्रिय खेलकुद परिषद्का सदस्यसचिव सिलवालले फर्किएर आएपछि केही हेरौंला भन्नु भएको छ’, मंगलबार रसिया जानुअघि अनुले भनिन्, ‘के कति रकम दिनुहुन्छ भन्ने चाहिँ थाहा छैन ।’
राष्ट्रिय खेलकुद परिषद्का सदस्यसचिव रमेशकुमार सिलवालले पनि अनुलाई केही आर्थिक सहयोग गर्ने प्रतिवद्धता जनाए पनि एकिन रकम भने तोकेका छैनन् ।
