नेपालमाला
१० आश्विन २०७८, आईतवार 
काठमाडौं : चितवन टाइगर्सले एभरेष्ट प्रिमियर लिग (ईपीएल) टीट्वेन्टी क्रिकेटमा रोमाञ्चक जित निकालेको छ । त्रिवि क्रिकेट मैदान कीर्तिपुरमा आइतबार भएको खेलमा चितवनले विराटनगर वारियर्सलाई दुई विकेटले पराजित गरेको हो ।
विराटनगरले दिएको एक सय ५२ रनको लक्ष्य चितवनले २० ओभरमा आठ विकेट गुमाएर पूरा गरेको थियो । चितवनको जितमा राजेश पुलामी मगरले अविजित ४३ रन बनाए । यस्तै भीम सार्कीले ३०, दीलिप नाथले २३, करिम जानतले १९ र इशान पाण्डेले १० रन बनाए । विराटनगरका सिकन्दर राजा र करण केसीले दुई÷दुई विकेट लिए । यस्तै प्रतिश जिसी, अनिल खरेल र रायन पठानले एक÷एक विकेट हात पारे ।
यसअघि टस हारेर पहिले ब्याटिङ गरेको विराटनगरले २० ओभरमा नौ विकेट गुमाएर एक सय ५१ रन बनाएको थियो । विराटनगरका सिकन्दर राजाले सर्वाधिक ६७ रन बनाए । यस्तै अनिल साहले ३२, सौरभ खनालले ३० र विक्रम भुसालले सात रन बनाए । चितवनका कप्तान सोमपाल कामी, कमल ऐरी, करिम जानत र सागर ढकालले दुई÷दुई विकेट लिए । जितसँगै चितवनले दुई अंक जोडेको छ ।
आइतबार नै भएको पोखरा राइनोज र भैरहवा ग्लाडियटर्सबीचको खेल भने वर्षाले बिथोलेको छ । कीर्तिपुरमा भारी वर्षा भएपछि दुवै टोलीले एक÷एक अंक बाँडेका छन् ।
टस जितेर पोखराले ब्याटिङ गरिरहँदा खेल वर्षाले बिथोलिएको थियो । खेल रोकिनु अघि पोखराले १०.१ ओभरमा सात विकेट गुमाएर ६५ रन बनाएको थियो । पोखराका असेला गुणारत्नेले २३ रन बनाउँदा विवेक यादव १६ रनमा अविजित थिए । पोखराका चार खेलाडीले खाता नखोल्दै पेभेलियन फर्किएका थिए । भैरहवाका दुर्गेस गुप्ताले तीन विकेट लिए । यस्तै धमिका प्रसाद, अभिनाष बोहरा र तुलबहादुर थापाले एक/एक विकेट हात पारे ।
