रुक्मशमशेर राणाको निधन

काठमाडौं : राष्ट्रिय खेलकुद परिषद् (राखेप)का पूर्व सदस्यसचिव रुक्मशमशेर राणाको निधन भएको छ ।

राणाको गए राति निधन भएको उनको पारिवारिक स्रोतले पुष्टि गरेको छ । लामो समयदेखि राणाको स्वास्थ्यमा समस्या देखिएको थियो ।

नेपाली खेलकुदको सर्वोच्च निकाय राखेपको दुई पटक नेतृत्व गरेका राणाले नेपाल ओलम्पिक कमिटीको अध्यक्षको भूमिका पनि निर्वाह गरेका थिए । उनी नेपाल ओलम्पिक कमिटीका वर्तमान मानार्थ अध्यक्ष पनि थिए ।

राणा पहिलो पटक २०५० सालदेखि २०५१ सालसम्म र दोस्रो पटक २०५४ सालदेखि २०५५ सालसम्म राखेपको सदस्यसचिव बनेका थिए ।

राजनीतिक पृष्ठभूमि राणाले जीवनको अधिकांश समय खेलकुदमै बिताए ।

नेपाल ओलम्पिक कमिटीमा एक मुख्य पात्र राणा पनि थिए । पछिल्लो समय ओलम्पिक अभियानलाई विवादरहित बनाउन उनले नेपाल ओलम्पिक कमिटीलाई एक बनाउन सहयोगी भूमिका खेलेका थिए ।

राणालाई सम्मान स्वरुप एनओसीले आफ्नो मानार्थ अध्यक्ष समेत बनाएको थियो । राणाले अलिख नेपला फुटबल संघ (एन्फा)को कार्यवहाक अध्यक्षको रुपमा समेत नेतृत्व गरे । उनले विभिन्न संघमा नेतृत्वदायी भुमिकामा रहेर काम गरेका थिए ।

राणा पछिल्लो समय मिर्गौला, सुगर र प्रेसरलगायतका रोगबाट ग्रसितथिए ।

राणा अन्तिम समयसम्म नेपाली कांग्रेसकै नजिक रहे । उनी कांग्रेस नेतृत्वको सरकारको पालामा भारतका लागि नेपाली राजदूत भएका थिए । रुक्म शमशेर नेपाली कांग्रेसका संस्थापक नेता सुवर्णशमशेर राणाका कान्छा छोरा हुन् ।

उनको आजै पशुपति आर्यघाटमा दाहसंस्कार गरिने पारिवारिक स्रोतले जनाएको छ ।