नेपालमाला
२० भाद्र २०७८, आईतवार 
काठमाडौं : दोस्रो अन्तर्राष्ट्रिय मैत्रीपूर्ण फुटबलमा नेपाल पराजित भएको छ । त्रिपुरेश्वरस्थित दशरथ रंगशालामा आइतबार भएको खेलमा नेपाल भारतसँग २–१ गोलले पराजित भएको हो ।
भारतको जितमा फारुख हाजी चौधरी र सुनील क्षत्रीले एक÷एक गोल गरे । नेपालका तेज तामाङले सान्त्वना गोल फर्काएका थिए ।
निकै प्रतिस्पर्धात्मक खेलमा तीन वटै गोल दोस्रो हाफमा भएको थियो । खेलको ६२औं मिनेटमा फारुख हाजी चौधरीको गोलमा भारतले अग्रता बनाएको थियो । सुनील क्षत्रीले हेडमार्फत डिबक्सभित्र उपलब्ध गराएको बललाई चौधरीले जाली चुमाएका थिए । नेपाली खेलाडी सम्हालिन नपाएको मौकामा चौधरीले गोल गरेका थिए । नेपालले आयुष घलानको स्थानमा नवयुग श्रेष्ठलाई परिवर्तन गरेको थियो । नवयुग मैदान प्रवेश गर्दैगर्दा नेपाली खेलाडी अल्मलिए र त्यसको फाइदा भारतले उठायो ।
त्यसपछि खेलको ८०औं मिनेटमा कप्तान क्षत्रीले गोल गर्दै भारतको अग्रता दोब्बर बनाए । नेपाली टोली गोलका लागि हतारिएको मौकामा काउन्टर एट्याकमा उनले वान भर्सेस वानमा गोल गरेका थिए । खेल सकिन पाँच मिनेट बाँकी छँदा तेज तामाङले गोल गर्दै नेपाललाई खेलमा फर्काउने प्रयास गरेका थिए । करिब २० यार्ड टाढाबाट तेजको शक्तिशाली प्रहार सिधै गोलमा परिणत भएको थियो । तेजको प्रहारलाई भारतीय गोलरक्षक अमरिन्दर सिंहले नियाल्न समेत सकेनन् ।
भारतको तुलनामा नेपालले धेरै अवसर बनाए पनि फिनिसिङमा चुकेको थियो । खेलको १३औं मिनेटमा मनिष डाँगीले डिबक्सभित्र फ्रि बल पाए पनि गोल गर्न सकेनन् । उनी बलमा अलमलिँदा नेपाल अग्रता बनाउनबाट चुकेको थियो । नेपाली टोलीका मुख्य प्रशिक्षक अब्दुल्लाह अलमुताइरीले पहिलो मैत्रीपूर्ण खेल खेलेकामध्ये सुरुवाती टोलीमा तीन खेलाडी परिवर्तन गरेका थिए । उनले डिफेन्समा सुजल श्रेष्ठ र फरवार्डमा आशिष लामा र मनिष डाँगीलाई मैदान उतारेका थिए ।
खेलको २८औं मिनेटमा आशिष लामाले अर्को सुन्दर मौका गुमाए । आयुष घलानले उपलब्ध गराएको सुन्दर पासमा आशिष चुकेका थिए । त्यसपछि ६५औं मिनेटमा विशाल राईले डिबक्स नजिकैबाट गोल गर्न सकेनन् । ७३औं मिनेटमा मनिष डाँगी पनि पोस्ट् नजिकै चुके । अञ्जन विष्टको पासलाई उनले सदुपयोग गर्न सकेनन् ।
दोस्रो मैत्रीपूर्ण खेलको उत्कृष्ट खेलाडी नेपालका तेज तामाङ र भारतका अनिरुद्ध थापा घोषित भए । उनीहरुले जनही २५ हजार पुरस्कार प्राप्त गरे । यसैगरी म्यान अफ दी सिरिज भारतका रहिम अली घोषित भए । उनले एक लाख पुरस्कार पाए ।
माल्दिभ्समा आयोजना हुने साफ च्याम्पियनसिपको तयारीका लागि नेपालले भारतसँग मैत्रीपूर्ण खेल खेलेको हो । यसअघि बिहीबार भएको पहिलो मैत्रीपूर्ण खेलमा नेपाल र भारतले १–१ गोलको बराबरी खेलेका थिए । साफको तयारीका लागि नेपाली टोली भदौ २५ गते कतार प्रस्थान गर्नेछ । कतारको दोहामा तयारी गरेर नेपाली टोली माल्दिभ्स जानेछ । साफ च्याम्पियनसिप असोज १५ देखि असोज ३० गतेसम्म आयोजना हुँदैछ । नेपालले आयोजक माल्दिभ्ससँग खेल्दै प्रतियोगिताको सुरुवात गर्नेछ । नेपाल र माल्दिभ्सबीचको खेल असोज १५ मा मालेस्थित राष्ट्रिय फुटबल स्टेडियममा हुनेछ ।
किरणको कीर्तिमान
राष्ट्रिय टोलीका कप्तान तथा गोलरक्षक किरण चेम्जोङले नेपालका लागि सर्वाधिक खेल खेल्ने खेलाडीको कीर्तिमान बनाएका छन् । भारतविरुद्धको दोस्रो मैत्रीपूर्ण अन्तर्राष्ट्रिय खेलसँगै किरणले यो कीर्तिमान बनाएका हुन् । किरणले आइतबार राष्ट्रिय टोलीबाट ७४औं खेल खेलेका हुन् ।
उनले पूर्व कप्तान विराज महर्जनको कीर्तिमान तोडेका हुन् । विराजले नेपालका लागि ७३ खेल खेलेका थिए । किरणले बिहीबार भारतविरुद्धको पहिलो मैत्रीपूर्णमा विराजको कीर्तिमान बराबरी गरेका थिए । विराजले नेपालका लागि सर्वाधिक खेल खेल्ने कीर्तिमान थ्री नेसन्स कपको फाइनलमा बनाएका थिए । त्यही खेलबाट उनले अन्तर्राष्ट्रिय फुटबलबाट सन्न्यास लिएका थिए ।
गोलरक्षक विशालको डेब्यु
गोलरक्षक विशाल श्रेष्ठले आइतबार राष्ट्रिय टोलीमा डेब्यु गरेका छन् । भारतविरुद्धको दोस्रो मैत्रीपूर्ण खेलमा विशालले कप्तान किरण चेम्जोङको स्थान लिँदै राष्ट्रिय टोलीमा डेब्यु गरेका हुन् ।
विशाल ८६औं मिनेटमा कप्तान किरण चेम्जोङको स्थानमा मैदान प्रवेश गरेका थिए । ए डिभिजन लिग विजेता मच्छिन्द्र क्लबका गोलरक्षक समेत रहेका विशाल राष्ट्रिय टोलीमा एक दशकभन्दा लामो समयदेखि रहे पनि डेब्युको अवसर पाएका थिएनन् । सन् २०११ मा विश्वकप छनोटका लागि घोषित टोलीमा विशाल पहिलो पटक परेका थिए । त्यसयता किरण पहिलो रोजाईमा पर्दा विकेश कुथुसँगै विशाल श्रेष्ठ वैकल्पिक गोलरक्षक रहेका थिए ।
यसैगरी राजन गुरुङले पनि आइतबार राष्ट्रिय टोलीमा डेब्यु गरेका छन् । उनी खेलको ८६औं मिनेटमा मनिष डाँगीको स्थानमा मैदान प्रवेश गरेका थिए । एन्फा एकेडेमीका उत्पादन २१ वर्षीय डिफेन्सिफ मिडफिल्डर राजनले घरेलु फुटबल भने विभागीय टोली नेपाल एपीएफ क्लबबाट खेल्ने गर्दछन् ।
