नेपालमाला
२ भाद्र २०७८, बुधबार 
काठमाडौं : काठमाडौंमा आज दिनभर मौसममा बदली रहने छ । बिहानैबाट सुरु भएको वर्षा दिउँसो केहीबेर रोकिएर पुनः सुरु हुने मौसमविद् समीर श्रेष्ठ बताउँछन् ।
“काठमाडौंमा आज दिनभर मौसममा बदली रहने छ । अहिले पानी परिरहेको छ । दिउँसो केहीबेर रोकिएर पुनः साँझसम्म वर्षा भइरहने छ,” मौसमविद् श्रेष्ठले भने । उनका अनुसार केही दिन काठमाडौंको मौसममा बदली रहने छ ।
शुक्रबारसम्म काठमाडौं उपत्यकामा पानी पर्नेछ । न्यून चापीय रेखा नेपाल नजिक रहेकाले पानी परेको भन्दै उनले भने, “आज र भोलिसम्म पनि काठमाडौंमा पानी पर्ने छ । तर, शुक्रबारबाट भने पानी पर्नेक्रम केही कम हुने छ,” श्रेष्ठले भने ।
आज विहान साढे ७ बजे २१ डिग्री सेल्सियस रहेको काठमाडौंको तापक्रम दिउँसो बढेर २६–२८ डिग्री सेल्सियससम्म पुग्ने छ ।
आज विहान सामान्यदेखि पूर्ण बदली रही सातवटै प्रदेशका केही स्थानमा हल्कादेखि मध्यम वर्षा भइरहेको छ । आज दिउँसो देशभर सामान्यदेखि पूर्ण बदली रही धेरै स्थानमा हल्कादेखि मध्यम वर्षाको सम्भावना रहेको छ ।
