१४ औं साग २०२३ को मार्चमा

काठमाडौं : पाकिस्तानले आयोजनाको जिम्मा लिएको १४औं दक्षिण एसियाली खेलकुद (साग) सन् २०२३ को मार्चमा आयोजना हुने भएको छ । दक्षिण एसियाली ओलम्पिक काउन्सिलको सोमबार बसेको भर्चुअल बैठकले १४औं साग सन् २०२३ को मार्चमा गर्ने निर्णय गरेको हो ।
पाकिस्तानका विभिन्न पाँच शहरमा आयोजना हुने १४औं सागमा २७ खेल समावेश गरिएको छ । मुख्य खेलहरु लाहोरमा हुनेछ । त्यसबाहेक फैसलावाद, गुजरनवाला, इस्लामावाद र सियालकोटमा पनि खेलहरु आयोजना हुनेछ ।
साग आयोजना हुने खेलस्थल निरीक्षण गर्न दक्षिण एसियाली ओलम्पिक कमिटीका सदस्यहरुलाई सन् २०२१ को अन्त्यमा निमन्त्रणा गर्ने निर्णय पनि भर्चुअल बैठकले गरेको छ । बैठकमा भारत, बंगलादेश, श्रीलंका, माल्दिभ्स र भुटान ओलम्पिक कमिटीका अध्यक्ष तथा महासचिवको उपस्थिती रहेको थियो ।
१३ औं साग सन् २०१९ मा नेपालमा आयोजना भएको थियो । घरेलु भूमिमा आयोजना भएको १३औं सागमा नेपालले ५१ स्वर्ण ६० रजत र ९५ कांस्यसहित कुल दुई सय ६ पदक जितेको थियो ।
१३औं सागको समापनपछि पाकिस्तानलाई १४औं साग आयोजनाको लागि झण्डा हस्तान्तरण गरिएको थियो । नेपाल ओलम्पिक कमिटीका अध्यक्ष जीवनराम श्रेष्ठले पाकिस्तान ओलम्पिक कमिटीका अध्यक्ष सैयद आरिफ हसनलाई १४औं साग आयोजनाको झण्डा हस्तान्तरण गरेका थिए ।